#Җәмгыять 31 мая 2023, 11:34

Юлыңа аю очраса. нишләргә?

31 мая 2023, 11:34

Күптән түгел Лаеш районының Серебрячиха авылы янында җирле халык аю эзләренә юлыккан иде. Ерткыч хайван эзләре яр буенда табылган. Шуңа бәйле рәвештә Татарстанның Биологик ресурслар дәүләт комитеты аюлар белән очрашканда үзеңне ничек тотарга кирәклеге турында искә төшерә.

Скопировать ссылку

Белгечләр әйтүенчә, республика юлларында көрән аюлар белән очрашу очраклары теркәлә. Хәтерләсәгез, бер айлар элек Татарстан Рәисе Рөстәм Миңнеханов эш сәфәре барышында вертолеттан күргән аюны видеога төшергән иде.

Биологик ресурслар комитеты мәгълүматы буенча, республика территориясендә 25 аю яши. Аларны Әгерҗе, Яшел Үзән, Мамадыш, Балык Бистәсе һәм Саба районнары территориясендә очратырга мөмкин. Киров өлкәсе һәм Марий Эл урманнарыннан күчеп йөриләр икән. Җәйге миграция вакытында аларның саны 60-70 башка җитә.

Аю белән очрашканда үзеңне ничек тотарга?

Кыргый хайваннар белән очрашканда, паникага бирелмәскә, күзләренә карамаска, чөнки ул моны сезнең тарафтан агрессия дип кабул итә. Акрын гына китеп бару ягын карагыз.

Йөгерергә һәм хайванга арка белән борылырга ярамый. Якынлашкан очракта, аны кискен тавышлар белән куып җибәрергә тырышыгыз.
Табигатькә чыккан булсагыз, палаткалар, ау өйләре янында, ял иткән урында да ризыклар калдырмагыз. Лагерьларны ачык урыннарда, тирә-якны күзәтерлек итеп урнаштырыгыз.

Беркайчан да, никадәр сөйкемле тоелсалар да, аю балаларына якын бармагыз. Аларны ашатырга яисә үз яныгызга чакырырга омтылмагыз, чөнки янәшәләрендә кайдадыр аларның әнкәсе була.

Моннан тыш, белгечләр аюларның гадәттән тыш бал яратулары сәбәпле умарта ояларына йөрергә яратуларын искәртә.
Фото: https://www.freepik.com/

Кызыклы яңалыкларны күзәтеп бару өчен Телеграм-каналга кушылыгыз.