Чүп-чарга баткан фатирдан табылган маугли-кызның әнисе: «Мин аны биш ел асрап торам»

– Мине кызымны газаплауда, аны үз-үзен үтерү дәрәҗәсенә җиткерүдә, кыйнауда гаеплиләр. Бу һич кенә дә алай түгел. Мин аның әнисе, мин аның тудырдым. Биш ел асрап, ашатып-эчертеп, киендереп торам, үстерәм, – дип белдергән кулга алынган хатын.   
11 мартта хастаханәдә дәваланучы кыз янына Россиянең бала хокуклары буенча вәкаләтле вәкиле Анна Кузнецова килгән. Аның сүзләренә караганда, хәзерге вакытта баланың хәле уртача авырлыкта дип бәяләнә.

– Бала сөйләшми. Без тәкъдим иткән ризыкларны ул башта исни, аннан соң гына кулына ала. Караватта йокларга да өйрәтелмәгән. Без аны авырлык белән яткырдык. Ул судан да курка, – дигән Анна Кузнецова.   

Моңа кадәр матбугат чараларында биш яшьлек Любаның чүп-чар белән тулган фатирда табылганлыгы турында хәбәр ителгән иде. Украинлы әтисе үз иленә киткән. Ә әни дип аталган кеше балага ризык калдырып кына китә торган булган.

Фатирдан гадәти булмаган елау тавышы ишеткән күршеләре ишекне ватып ачарга мәҗбүр булган. Чүп-чар белән тулган фатирда яшәүче балакайның сөйләшә дә белмәве ачыкланган.