- 2019 елның 17 июлендә диспансеризация үтәр өчен район үзәгенә, Базарлы Матакка бардык. Гөлшат руль артында иде. Мине көтеп торды, кеше күп бит, минем өчен чират алып торды. Бар табибны да үтеп, әлсерәп беттек. Кайтыр юлга чыкканчы, кибеткә кердек, баланың күңеле төшә бит инде. Аны сыйлыйсы килә, төрле тәм-томнар алдым. Өйгә кайткач, чәй эчтек. Көн дә эссе, ятып торыйк, хәл алыйк, арылды, дим. “Әни, син ял ит, мин абыйның бүлмәсен юып чыгам, алайса иртәгә эш күп булачак”, диде. Мин ял итәргә яттым, ул абыйсының бүлмәсен юып чыгарган, - дип искәа ала Гүзәл апа.
Кич белән район үзәгендә полиция бүлегендә эшләгән абыйсы Ришатны бер очрашуга илтеп кайта кыз.
- Төнлә барып алырмын, дип сөйләштеләр. Без кичен өчәүләшеп чәй эчтек, Гөлшат ятып тормыйм, дип гитарасын алып уйнады. Русча җырлар җырлады, татар җырын да җырла инде, дигәч, “Кайда син ярым”, дигән җырны сузды. Моңлы иде балакаем. Без уннарда ятканбыздыр. Төнге бердә Ришат әтисенә шалтыратты. “Гөлшат машина белән янга төшкән”, диде. Үлгән дип әйтмәде. Шок хәлендә йорттагы машинаны кабыздык. Барсак, Гөлшатыбыз үлгән иде инде. Абыйсына хәзер килеп җитәм, дип шалтыраткан. Ришат килми дә килми, ди. Аннары аңа ГИБДД хезмәткәрләре шалтыратып әйткән. Иске Чаллыда туй иде, аннан кайтучылар юл кырыена төшеп киткән машинаны күреп алган да полициягә хәбәр иткәннәр.
Төнге юл, Яңа Чаллы белән Үргәгар арасындагы халык теленә “шаукымлы” дип кергән урын, машина юл читенә очкан... Гөлшатның бер җиренә дә зыян килмәгән, башы гына бәрелгән, муен сөяге сынган.
- Кызыбыз юл һәлакәтенә юлыккан “Лада Приора”ны 3 ел элек сатып алган идек, - дип сүзгә кушыла Муса абый. - Гөлшат аңарда ике ел йөрде. Машинага утыргач үк күзлеген кия, телефонын урынына куя, ременен каптыра иде. Шуннан соң гына машинасын кабыза. Юл һәлакәтенең төрле версияләре булды. Машина никтер кире борылып куйган. Юлның сул ягына килеп төшкән. Үргәгар белән Яңа Чаллы арасында, тәбәнәк кенә юл инде. Фаҗиганең килеп чыгу сәбәбен беркем аңлата алмады. Аннан тикшерү артыннан йөрмәдек тә, баланы кайтарып булмый бит. Ник каршы юлга чыккан, ник шулай булган? Шул сорау борчый безне инде ничә ел.
2019 елның 18 июлендә Гөлшатны мәңгелек йортына иңдерәләр.
- Аны барыбыз да өзелеп сагынабыз, юксынабыз, арабызда булмавына ышана алмыйбыз. Кызыбыз Казанда гынадыр, менә-менә кайтып керер кебек. Шулай юатабыз бер-беребезне. “Күзләр генә тигәндер”, диючеләр дә булды. 2019 елны “Газпром трансгаз Казан” компаниясе уздырган “Яшәү чыганагы – газ” бәйгесендә катнашкан иде. Гөлшатыбыз 1 урынны алган. Бүләкне үзе барып ала алмады бахыркаем. Ике туган апасы барып алды. Бүләккә планшет биргәннәр. Роза гөлем, балкыды, балкыды да, китте дә барды. Барысына өлгерде, әле күпме эшләнмәгән эше калды. Дүртенче курстан соң икенче бер профессия алам дип хыялланды. Юридик факультетка укырга керер өчен бөтен документларын җыйган булган. Каникул вакытында эшләп алырмын дип фотосалонга эшкә кергән иде. Ике атна торам да китәм, диде. Аның эшкә кергәнен дә белми калдык. Абыйсы хәбәр итте. Эшләгән акчасын җыя барган. Начальнигы соңрак Вконтакте сәхифәсенә язды. Юл һәлакәтендә һәлак булуын ишетмәгән булган. “Килеп алыгыз хезмәт хакын, ул алмыйча киткән иде”, диде.
Төркемнәре кураторы, кафедра доценты Роман Баканов Гөлшат турында болай дип язган:
– Башлап килүче журналист. Үз хыялы турында кычкырып йөрми, алга барырга тырыша. Бик яхшы укый. Дуамал түгел, ул төркемебезнең иң төпле укучысы. Иҗади яктан үсә. Бик күп укый. Аның белән аралашу, эшләү бик уңай иде. Гөлшат турында узган заманда сөйли алмыйм.
Муса абый белән Гүзәл апа кызларының бүлмәсен бер дә үзгәртмәгән. Ул ничек калдырган, шул килеш тора. “Музей кебек ул безнең өчен”, ди алар бертавыштан.
- Саннар могҗизасы турында күп тапкырлар ишеткәнем бар, сеңлем. Әмма ышанмый идем. Әмма безнең гаиләдә 18нче сан роль уйнады кебек. Чөнки 18 декабрьдә улыбыз Ришат, 18 октябрьдә кызыбыз Гөлшат дөньяга килде һәм 18 июльдә арабыздан китеп тә барды, - дип күз яшьләре белән сөйли Гүзәл апа.
Урыны җәннәттә булсын кояшкайның. Бу язмабыз Гөлшатның рухына дога булып ирешсен.
Гөлшатның якты истәлегенә багышлап Гөлнара Нургаязова бәет чыгарган.
Берни белми йоклаганмын төнлә,
Иртән торсам... юк-юк... бу ялган...
18 нче июль - әллә нинди
кап-караңгы төскә буялган...
Дөрес әйтми бит ул минем әти...
Әллә үзем күрәм төш кенә?...
“Гөлшат үлгән”- дигән җөмләсенә,
Ышанасы килми һич кенә.
Иң-иң якын дустым бит син минем,
Бердәнберем,- дисәм, ялгышмам.
Иң акыллы, ышанычлы дусны
Башка беркем белән алмашмам.
Бары 19 яшь иде сиңа,
22 – минем үземә.
Тик, соклана идем, олылар күк
Уйлап әйткән һәрбер сүзеңә.
Синең киңәшләрне тыңлый идем,
Үрнәк ала идем мин синнән.
Шундый рәхәт җылы бөрки иде,
Дустым, синең нурлы йөзеңнән.
Казанга гел бергә китә идек,
Минем машинага утырып.
Әгәр белсәм, соңгы тапкыр,ныклап,
Карар идем сиңа тутырып.
Тәҗрибәң дә аз иде шул әле,
Матак юлы... Актин урманы...
Җенле урын,- диеп сөйләшкәнне,
Белә идеңме соң син аны?
12 һәм 1 ләр арасында,
Ничек төштең дамба астына?
“Приора”ң нигә тыңламады?
Зыяның соң тиде кайсына?
Нигә? Нигә? Нигә? Нигә? Нигә?
Җавапны, тик, үзең беләсең.
Ышанасы килми, күрәчәгең
Шул урында булган, күрәсең.
Киләчәктә бит син бик танылган
Журналистка идең буласы.
20 ңдә, 30, 40 ың да,
80 ең дә иде туласы.
Соңгы сулышларың вакытында,
Уйладыңмы, дустым, син мине?
Бик-бик озак, гомер буйларына
Оныта алмам инде мин сине.
Казаннарга киткән көннәремдә,
Шул урыннан һәрчак үтәсе.
Авыр шундый, яшем ташып чыга,
Ничек кенә сабыр итәсе?
Узган саен чәчәк куям сиңа,
Кабереңә барып сөйләшәм.
Әле һаман син янымда кебек,
Синең белән һаман киңәшәм.
Ник ашыгып киттең, әтиеңне,
Әниеңне салып утларга?
Төшләремдә бик еш кайтып киләм
Синең белән булган чакларга.
Абыеңны бик ярата идең,
Ник калдырып киттең, алайса?
Бигрәк читен аңа синнән башка,
Ике бөртек бит сез, ләбаса?...
Нигә? Нигә? Нигә? Нигә? Нигә?
Үзең теләмәдең бит инде.
Хыялыңа каршы килеп, җаның
язмышыңа таба җилкенде.
Әлки өсләрендә - кара болыт,
Яңа Чаллы - тоташ томанда.
Әкрен генә тормыш дәвам итә,
Минем дустым гына юк анда...
Тиздән, яңа уку елы җитәр,
КФУ да сине көтәрләр.
Иде мәңге килмәсеңне белгәч,
Синнән башка дәвам итәрләр.
Алтын медаль белән тәмамлаган,
Мәктәбеңдә искә алырлар.
Укытучыларың, классташлар
Хәер-догаларда калырлар.
Әле һаман күңел ышана алмый,
Киләчәкнең синсез таңына.
Хакыйкатнең ачылыгы, ләкин,
Барып җитә инде аңыма.
Гөлшат дустым, матур хәтирәңне
Гел саклармын йөрәк түремдә.
Җәйләр, көзләр, кышлар, язларын да,
Тыныч йокла салкын гүреңдә!




Кызыклы яңалыкларны күзәтеп бару өчен безнең МАХ каналына кушылыгыз.
Лилия Гайнуллина
Комментарийлар
4
0
Ходай туганнарына сабырлык бирсен. Бик авыр кичерде бар район халкы.
0
0
4
2
Әти-әнисенә, туганнарына сабырлык, кына телэп була бу язманы укыгач, кыз ьаланың урыны җәннәт түрләрендә булсын. уразасында бердә калдырмады,...
0
0
6
0
Анда да әйбәт кешеләр кирәктер, сабырлык телим.
0
0