Тәкъдир ничек язган бит... Бер туй тарихы

Ике төрле милләт вәкиле арасында корылган гаиләдә тел, йолалар, туачак баланың дине һәм тәрбиясе турындагы сораулар килеп баса. Кавышкан пар үзләрен бик бәхетле итеп тойсалар да, ике як туганнар бер-берсе белән аралаша алмыйча, “социаль аралык” саклап яши.

Көнбатыштан килгән модага карасак, халыклар бер-берсенә һәрдаим толерантлы һәм түземле булырга тиеш. Әмма буыннан-буынга сакланып килгән татарның әхлаклыклыгы, милләткә тугры калу принцибы йөрәк “эшләрен” икенче планга калдырып, безгә тәрбия белән билгеләгән “дөрес” юлны сайларга өнди. Дин вә милләт мәсьәләсе җитди, әмма сайлап алу барыбер кешенең үзенә кайта.

Алия һәм Артур Исмендеевлар 2020 елның сентябрендә өйләнеште. Алия үзе Актаныш кызы, милләте белән татар. Ире Артурга килгәндә – ул метис: әтисе – чуаш, әнисе – украин.

Яшьләр Алия иптәш кызына Чирмешәнгә килгәч танышалар һәм бер-берсен охшатышып калалар. Бер елдан артык йөргәннән соң, Артур һәм туганнары Актанышка кыз сорарга да киләләр.

– Әти-әни Артурга каршы килмәде. Аның әти-әнисе дә мондый адымны хуплады. Ике якка да кызык булып тоелды андый әйбер. Иремнең гаиләсендәге йолалар белән кызыксындым, ә аның әти-әнисе мөселман булуыма бик шатланып, безнең теләкләргә колак салды, – ди Алия. – Үзебезнең гореф-гадәтләребезне дә көчләп тагарга тырышмадык, ә алар, киресенчә, хөрмәт белән барлык кануннарга туры китерергә тырыштылар. Никахыбызны бабам укыды. Туйны якыннар арасында гына уздырдык. Ул яртылаш урысча, яртылаш татарча үтте инде. Тел, дин аркасында килеп туган проблемалар юк. Әлегә бала булмагач та, тәрбияне ничек бирербез, дигән сорауларыбыз да тумый. Шуны гына алдан килешеп куйдык: бала үскәч юлын үзе сайлар.

Алия үзенең гомерлек ярын тапкан дип ышана. Бу мәхәббәт тарихын укып чыкканнар арасында да бәлки сайлау алдында торганнар бардыр. Тәкъдир ничек язган бит. Ләкин шуны хәтерләгез: сезнең яшисегез бар, сезнең бәхетле буласыгыз бар.

Фото: http://pixabay.com