Өндәү файдасы

Без өлкәннәр: «Хәзерге яшьләр тәрбиясез, урын да бирмиләр», - дип ачуланырга яратабыз. Юк, җәмәгать, үзгәрде яшьләр. Автобуска өлкәннәр килеп керүгә, сикереп торып: «Утырыгыз», - дип урын бирә башладылар. Бу үзгәрешкә нәрсә сәбәпче булды икән?!
Хәзер күп автобусларда тукталышларны радио челтәреннән русча-татарча әйтәләр, шул ук вакытта өлкәннәргә, балалы хатыннарга урын бирү турында да искә төшерәләр. Бу турыда быел хәтта автобус салоннарында да киңәш-плакатлар эленгән иде. Мондый җайланмаларны шәһәрнең бөтен төр җәмәгатьчелек транспортына урнаштырырга кирәк. Радио-автомат аша тукталышларны гына әйтү бер хәл, пассажирларга шәһәрнең чисталыгы турында мөрәҗәгать итүләре бигрәк тә куандыра.