Эш урынын алыштырырга уйласаң, хезмәт ярминкәсенә кил!

Казанда әлеге чара УНИКС бинасында (Профессор Нужин урамы,2) үткәрелә.

– Россия Президенты Владимир Путин һәр өлкәдә кадрларның гаять тә әһәмияткә ия булуын искәртә. Хезмәт ярминкәләре “Кадрлар” илкүләм проекты кысаларында оештырыла. Татарстанда халыкның эш урыннары белән тәэмин ителеше 62 процентны тәшкил итә, 2030 елга 60 мең кешегә эш урыны булдыру бурычы куелды. Республикада уртача хезмәт хакы 75 мең сум, авыл хуҗалыгында 63 мең сум. Югары уку йортларын тәмамлап авыл хуҗалыгына эшкә кайтучыларга бер мәртәбә 750 мең сум түләнә. Мәгариф һәм медицина белгечләренә дә дәүләт ярдәмнәре каралган, – диде Татарстанның хезмәт, эш белән тәэмин итү һәм социаль яклау министры урынбасары Клара Таҗетдинова “Татар-информ” мәгълүмат агентлыгында үткәрелгән матбугат конференциясендә.

Хезмәт яшендәгеләр генә түгел, ә пенсионерлар да эшкә урнашу ягын карый ала. Клара Таҗетдинова аңлатканча, эшләүче пенсионерларның пенсиясенә индексация эштән вакытлыча китеп тормаган очракта да ясала.

– Хезмәт ярминкәләрендә 500 предприятие-эш бирүче катнаша. Республикада рәсми рәвештә теркәлгән эш урынсызлар 3 200 кеше, шул исәптән Казанда 1 185 кеше. Республика буенча 30 мең эш урыны (вакансия)  бар. Кешеләр хезмәт ярминкәләрендә эшкә урнашу, һөнәри осталыкны күтәрү яки алмаш һөнәргә уку, эшкә урнашканда дәүләт ярдәме турында белешә ала, – диде Татарстан Республикасының халыкны эш белән тәэмин итү үзәге директоры Тимур Муллин.

Казан федераль университетының карьера үсеше үзәге җитәкчесе Вячеслав Сәйдашев таныштырганча, УНИКС та хезмәт ярминкәсе 18 апрельдә 10.00-14.00 сәгатьләрдә була.

– Мәктәпләрнең өлкән сыйныфлары укучыларына студентлар тарафыннан әзерләнгән спектакль дә куела, – диде Вячеслав Сәйдашев.