Яу кырыннан кайткан хәрби нәни дустын күрергә килгән

Бүген әле мәктәптә генә укысалар да,тиздән булачак җиңүгә үзләренең өлешләрен кертергә теләп, яу кырындагы сугышчыларга хат язалар, рәсем ясыйлар, гуманитар ярдәм җибәрүдә катнашалар. Махсус хәрби операциядә кыр шартларында яшәгән хәрбиләрнең туган якларын, кадерле кешеләрен сагынуын киметергә, батырлык өстәргә тырышалар.  Башкалабызның  5нче гимназиясенең 3нче А сыйныфында укучы Артем Бубников дигән малай да язган булган мондый хатны. Үзе яратып суыра торган “әтәч” кәнфит тә салган конверт эченә.  Менә шул хат  Ринат  Курмашев  атлы батыр танкист кулына эләккән дә, аны бик сөендергән.  Апас районының Каратун авылы егете туган якка  ялга  кайтканда бу  хатны да алган. Үзен шатландырган мондый хат язган юмарт малайны  күрәсе килеп, гимназия директоры Альфред Рагимшиннан  рөхсәт алып, ул укый торган мәктәпкә килгән.  

Аны Артемның сыйныфына озатып куйганнар. Малай өчен генә түгел, һәммәсе хәтта укытучысы Гөлнара Якупова өчен дә көтелмәгән очрашу булган бу. Малай бераз каушап та калган  Күпне күргән, күпне кичергән  ир уртасы булса да, Ринат үзе дә бик дулкынланган.

Ишектән килеп керүгә ул Артемга хатын  күрсәтеп:” Син яздыңмы?”  - дип сораган да,  уңай җавап ишеткәч, аңа бүләкләрен бирә башлаган.  Алар, чынлап та, бик кадерле,  гомерлек  истәлек булырлык.  Ут – ялкын эченнән  кайткан, дары исе сеңгән бронежилет, кыр сумкасы һәм  танкистлар  кия торган шлем.  

Батыр танкист абыйсы шундый зур бүләкләр, хәтта Артем җибәргән “әтәч”не дә ашамыйча,  малайның үзенә күчтәнәч итеп алып кайткан. 23 февраль  бәйрәме алдыннан җыр смотры конкурсына сыйныфлары белән “Өч танкист” җырын өйрәнгән булганнар. Ул да бик ярап куйган,  кычкырып җырлап күрсәткәннәр.  Киләсе еллардагы  Аҗаган” уеннарында  Артем шушы  бүләкләрне киеп,  бик күп малайларны көнләштерер  әле.  

Ринатның ялы бетеп килә инде тиздән кабат Ватан азатлыгы өчен көрәшне дәвам итәргә китә ул. Исән генә булсын инде, фәрештәләр саклап йөртсен дә тизрәк җиңү белән кайтсын. Үзен Казанда нәни дуслары: Артем һәм аның классташлары  көтүен белү егеткә батырлык һәм көч өстәр дип тә ышанабыз. Бу хакта гимназиянең укытучысы Альмира Зәйнуллина хәбәр итте.