“Җиңү диктанты” кайчан һәм кайда узачак?

Бу, беренче чиратта, әби-бабаларыбызның батырлыгы турындагы хәтерне яңарту, әлеге дәһшәтле елларны кичкәннәргә хөрмәт күрсәтү һәм яу кырларында вафат булганнарны искә алу ысулы, дип билгели акцияне оештыручылар.

Татарстанның Архив эше буенча дәүләт комитеты рәисе Гөлнара Габдрахманова билгеләп узганча, быелгы тарихи диктант 25 апрель көнне республикабызның 363 мәйданчыгында узачак. Акциядә катнашырга теләк белдерүчеләр елдан-ел арта баруын әйтә ул. Узган елда тестны 20 меңнән артык кеше язган булса, быел тагын да күбрәк булачагына ышана. Һәрвакыттагыча иң күп мәйданчыклар Казан шәһәрендә урнашкан, Алабуга шәһәре, Тукай, Апас, Спас, Әлки районнары да бик актив икән.

“Җиңү диктанты” 2019 елдан бирле үткәрелә. 25 сорауга җавап бирүгә 45 минут вакыт бирелә. Араларында Татарстан Республикасы белән бәйлеләре дә бар. Сорауларны, гадәттә, Бердәм дәүләт имтиханына сораулар төзүчеләр әзерли. Аларның күбесе мәктәп программасына нигезләнгән. Тарих белән кызыксынган кеше аларга җавап бирер хәлдә, ди Гөлнара Габдрахманова.

- Мин бу диктантны һәр ел язам. Һәм һәр елны үземә ниндидер яңалык алам. Бөек Ватан сугышы белән бәйле бик күп архив документлары әле сер итеп саклана. Без әлегә кадәр күпне белмибез, барысын да өйрәнеп бетерү дә мөмкин түгел. Шуңа күрә ел саен бу чарада катнашып, син бик күп яңа мәгълүмат аласың, - дип ассызыклады ул.

Фото: tatar-inform.tatar