«Права»ларын алыргамы?

"Школа" тукталышына җитәрәк дәү машина безнең машинага якынлашканнан - якынлаша бара. Мәйтәм, бу, тучны хатын-кыз. "Поворотнигын" кабызмыйча, югары тизлекле полосадан урта полосага күчәргә җыена бу. Күрәсең, башка машина йөртүчеләр аның уй-фикерен алдан белергә тиеш, дип уйлыйдыр. Әмма, кызганыч, бөтен машина йөртүче дә экстрасенсорик сыйфатка ия түгел шул.

Озын сүзнең кыскасы, күчте бу урта полосага, әмма безгә бәрелергә чак кына калды. Куып тоттык моны, карасак, руль артыңда чынлап та хатын -кыз, үзе телефоннан сөйләшә. И-и шунда камерага төшереп ЮХИДИга җибәрәсе калган. Бу "оста йөртүче" ханым берничә юл кагыйдәсен бозды бит – "куркыныч йөртү", "руль артында телефоннан сөйләшү".

Мондый әкәмәт йөртүчеләр адым саен. Кораб кебек машинага утыралар да, юл кагыйдәләрен санга сукмыйча җилдерәләр. Аллаһ сакласын. Андыйларга, бигрәк тә хатын-кызларга права алуны нык катгыйландырасы иде. Чөнки кайчак мантыйкка сыймый торган адымга баралар.

Фото: ru.freepik.com