Тукай мәйданындагы җир асты юл кичүе төзекләндереләчәк

Казан мэры Илсур Метшин “эшлекле дүшәмбе” киңәшмәсендә Тукай мәйданындагы җәяүлеләрнең җир асты юл кичүенә капиталь ремонт үткәрергә әзерләнергә күрсәтмә бирде.

Хәтердәге чәчәкләр

– Тукай мәйданындагы җир асты юл кичүе мине әле аппарат җитәкчесе булган вакытларымнан ук хәтерли. Аннан чәчәкләр һәм бүләкләр сатып алып, аппарат җитәкчесе буларак, хезмәткәрләрнең һәммәсенә таратып чыгарга кирәк иде. 8 март көнендә аяксыз калып дигәндәй, кичен өйгә кайтып егыла идем. Мин андагы һәр почмакны беләм, ә ул, кызганыч ки, һаман шулай, нәкъ 20 ел элеккеге хәлендә. Быел аны капиталь төзекләндерергә кирәк. Горький паркы янында уңай мисал бар: без үз эшебезне эшләдек, ә төзүчеләр үзләренең эшен башкарды. Хәзер биредә дә Казанга лаеклы капиталь төзекләндерү башкарып чыгу зарур, – диде мэр Илсур Метшин, хатирәләрен яңартып.

БРИКС рухы

Җир асты юл кичүләре – шәһәр инфраструктурасының мөһим өлеше. Алар шәһәр кунакларында Казанга карата беренче тәэсирләрне тудыра. Горький паркы янындагы һәм Горький шоссесындагы җәяүлеләр юл кичүләре башкала дәрәҗәсенә җавап бирә, заман рухын чагылдыра. Казанда 2024 елда булган БРИКС саммитына әзерлек барышында инфраструктура (юллар, диварлар, парклар) төзекләндерелде. Тукай мәйданындагы җир асты юл кичүенә дә өлешчә төзекләндерү  үткәрелде.

“Җир белән күмәргә”

Тукай мәйданындагы җәяүлеләрнең җир асты юл кичүе 1970 елда төзелгән. Мәскәү архитекторларының бер төркеме 2019 елда әлеге корылманы “җир белән күмәргә” тәкъдим иткән булган. Имеш, җир асты кичүе Бауман урамы белән Петербург урамы ялганышын өзә. Шөкер, шәһәр җитәкчелеге мондый мәгънәсез тәкъдимнән баш тарткан. Казанның 2005 елның 27 августында ачылган “Тукай мәйданы” метро станциясе Тукай мәйданындагы җәяүлеләрнең җир асты юл кичүе белән тоташкан.

Тарих битләреннән

Казанның хәзерге Тукай мәйданы заманында Рыбнорядский (Рыбный) дип йөртелгән. Биредәге сәүдә мәйданчыгында ат арбаларыннан һәм чаналарыннан балык сатылган. Хәзерге Татарстан урамы белән Мәскәү урамы кисешкән урында мәшһүр Печән базары булган. Тукай мәйданы шулай ук Кооперативный мәйданы, Куйбышев исемендәге мәйдан атамаларында да йөртелде.

Тукай мәйданы халык телендә “Кольцо” буларак та мәгълүм. 1899 елда трамвайлар борылыш ясый торган “боҗра” тимер юл төзелгәч, казанлылар бу урынны “Кольцо” дип йөртә башлый. Әлеге атама буыннан-буынга, телдән-телгә күченеп яши бирә.