Урманнарга якын авыллар, гафу итегез! Сезгә “бәйрәм шашлыгы” юк

Татарстанда ел башыннан 1 320 янгын очрагы теркәлгән, аларда 46 кешенең гомере өзелгән, 47 кеше төрле дәрәҗәдә тән пешүләре алган.

– Быел янгыннар узган елның шушы чоры белән чагыштырганда 32 процентка күбрәк чыкты. Коры үлән януның 442 очрагы теркәлде. Түбән Кама, Казан, Чаллы, Яшел Үзән шәһәрләре тирәсендә, Тукай районы җирлегендә коры үлән яну очраклары аеруча күп булды. Коры үләнне яндыру кешенең үзе өчен дә һәм корылмалар өчен дә бик хәвефле. Кеше янгын боҗрасында калырга, ут корылмаларга күчәргә мөмкин. Казанда 19 мартта коры үлән уты Азин урамындагы йортка күчә язды. Хуҗалары эштә булган, ярый әле күрше-тирәдә яшәүчеләр утны күреп алып, янгын сүндерү хезмәтенә хәбәр иткәннәр, бергәләшеп утны сүндерергә керешкәннәр. Йорт саклап калынды. Мамадыш районындагы Яңа Кама аръягы бакчачылык ширкатендә корган үләннән күчкән ут 2 йортка шактый зыян салды, – диде Россия Гадәттән тыш хәлләр министрлыгының Татарстан буенча баш идарәсе җитәкчесе урынбасары Максим Трущин “Татар-информ” мәгълүмат агентлыгында үткәрелгән матбугат конференциясендә.

Янгынга каршы үзгә режим көннәрендә коры үләннәрне яндыру, табигатьтә ачык утта шашлык кыздыру, учак ягу, Кытай фонарьлары очыру, салют аттыру катгый тыела.

– Урманнарга терәлеп урнашкан 122 авылда һәм 76 бакчачылык ширкатендә янгынга каршы үзгә режим көннәрендә ачык утта гына түгел, мангалда да шашлык кыздыру рөхсәт ителми. Урманнардан читтәгерәк торак пунктларда шашлык кыздырырга мөмкин, ләкин мангал корылмалардан 5 метр ераклыкта урнаштырылган булырга тиеш. Мангал тирәсе корган үләннәрдән чистартылсын, соңыннан ут яхшылап сүндерелсен, – дип искәртте Максим Трущин.

Янгынга каршы үзгә режим таләпләрен бозган өчен штрафлар каралган. Гражданнарга –10-20 мең сум, вазифа биләгән затларга – 80-100 мең сум, эшкуарларга – 90-100 мең сум һәм юридик затларга – 400-800 мең сум. Янгын зур зыян китереп чыгарса, җинаять эше дә кузгатыла. Быел коры үлән яндырып йөргән 16 кешегә штраф салынган инде. 

– Янгын башланганда кешеләрнең күршеләрен өйдән алып чыгу, утны сүндерүдә катнашу кебек матур мисаллар бар. Ут белән бик сак эш йөртү сорала. Эссе көннәрдә җирдә яткан пыяла ватыгы, шешә дә үләннәргә ут каптырырга мөмкин. Пыяла шешә, күзлек автомобиль эчендә тәрәзә каршына куен калдырылмасын, – диде Максим Трущин.

Татарстан Рәисе Рөстәм Миңнеханов та май бәйрәмнәрендә иминлек мәсьәләләренә игътибарны көчәйтергә кушты.