Мөфти кайгы уртаклаша: “Аллаһыдан килдек һәм Аңа кайтачакбыз”

Татарстан мөфтие Камил хәзрәт Сәмигуллин Бейрут шәһәрендә фаҗига булу сәбәпле кайгы уртаклашты:"Дөньядагы иң гүзәл гарәп шәһәрләрнең берсен җимереп, күпсанлы кешеләрнең, шул исәптә дин кардәшләребезнең дә гомерен өзеп һәм имгәтеп, Бейрутта җанөшеткеч шартлау килеп чыга. Шушы авыр минутларда Татарстан мөселманнары күңелләре белән ливанлылар янында булып, аларның авыр хәсрәт ачысын уртаклаша. Моның иң яхшы чагылышы булып кылган догаларыбыз торыр: Аллаһы Тәгалә зыян күрүчеләргә шифасын бирсен, фаҗига корбаннарының туганнары һәм якыннарына әлеге югалту кайгысын күтәрергә ныклык һәм сабырлык бирсен. Ихлас күңелемнән җан биргән кардәшләребезнең Бөек Раббыбыз рәхмәтендә булуларын сорыйм: “Без Аллаһыдан килдек һәм Аңа кайтачакбыз”. Бейрут халкына әлеге һәлакәтне кичерүдә көчле иман, ныклык телим".

http://dumrt.ru