Татарстан мөселманнары хаҗга әзерләнә

Изге сәфәргә баручыларның беренче төркемен 23 сентябрьдә озатачаклар, иң соңгылары 29ы очачак икән. Хаҗга бару һәр мөселман тормышындагы иң мөһим вакыйга, шуңа да «Татарстан МНД-Хаҗ» сәфәргә чыгар алдыннан булачак хаҗилар өчен махсус уку курслары уздыра. Шундый укуларның беренчесе 6 сентябрьдә үткәрелгән. Семинарны уздырган Габдулла хәзрәт Галиев аларга Согуд Гарәбстаны Корольлеге территориясендә үзеңне ничек тотарга, дини йолаларны ничек башкарырга кирәклеген аңлаткан. Укулар теория буенча гына түгел, күрсәтмә әсбаплар кулланылып та алып барыла. Медицина бүлеге җитәкчесе Рамил Хисамов медицина куркынычсызлыгы һәм профилактикасы нормалары турында сөйләгән. Болардан кала булачак хаҗиларга «Хаҗ комплекты» таратылган. Ул хаҗ буенча кирәкле бөтен мәгълүматны үз эченә алган биш китаптан гыйбарәт. Уку курслары башкалада гына түгел, республиканың кайбер район үзәкләрендә дә узачак икән.

Юлга чыгучылар үзләре белән паспорт, өч данә фотосурәт һәм менингит белән дифтериядән прививка ясатылу турында сертификат та алырга тиешләр.

Хаҗга баручыларны 44 кешедән торган төркемнәргә бүлгәннәр, алар белән тәҗрибәле имам җитәкчелек итәчәк. Имам хаҗ йолаларының дөрес үтәлеше өчен дә җавап бирә. Изге урынга баручылар Мәккәдәге «Әл-Хәрам» мәчетеннән өч чакрым ераклыкта урнашкан кунакханәдә яшәячәкләр. Юлга әзерләнүчеләргә үзләре белән әйберләрне күп итеп алмаска, берничә комплект җәйге кием, уңайлы киелгән аяк киеме һәм көнкүреш кирәк-яраклары алырга киңәш ителә.

Сүз уңаеннан, быел хаҗ сәфәре 155 000 сумга төшә.