Шәһри Казан

Яңа елга 10 көн ял - бик күп ул. Килешәсезме?

Ничек, дуслар, Яңа ел каникуллары күңелле уздымы соң? Миңа калса, әлеге бәйрәмдә 10 көн тоташ ял итү дөрес хәл түгел. Бу вакыт эчендә тазарып кына калмыйча, бөтенләй эшнең нәрсә икәнен онытырга була.

Күп дигәндә, биш көн ял артыгы белән җитә. Шунысын да исәпкә алырга кирәк, алда тагын шулкадәр өйдә ятачагын белгән кеше бәйрәм итүен дәвам итәчәк. Яңа ел каникулының яртысын, мәсәлән, һичшиксез, майга өстәргә була, халык рәхәтләнеп шашлык кыздырыр, бакча эшләрен башкарыр иде.

Әлеге тема буенча постны “Шәһри Казан”ның инстаграмына урнаштырган идек, кулланучылар арасында зур гәп куерды. Әйтик, берәүләр фикер белән килешсә, икенчеләр өйдәге эш бетми ул, менә шушы ялларда аларны эшләргә кирәк, ди.

Әлфия исемле бер ханым:
– Кемнең 10 көн буена өендә утырасы килми, шул ялларга кадәр үзенә өстәмә эш эзләсен, ә күпләр өчен бу гаиләсе, балалары белән булу өчен менә дигән вакыт.
Миләүшә Диммиева исә болай дип кырт кискән:
– Эшкә чык, беркем дә тотмый!
Ландыш Сабитова:
– Бер дә күп түгел! Аллага шөкер, гаиләм белән эш турында уйламыйча бик күңелле ял итәбез!
Рәшидә апа:
– Түләнә  торып, яллар күп дип утырасы түгел, эшлим дигән кешегә эш җитәрлек. Менә түләнми генә ял итеп утырсагыз нишләр идегез???
Сирен Алтынбаева:
– Бер дә күп түгел! Ел буе коткән бәйрәм ялы. Аптыраган икән! Кыз-хатынга вообще эш бетми өйдә!
Наилә Нуриәхмәтова тәкъдим белән дә чыкты:
– Согласна! Мужиклар эшләсә дә ярый, хатын-кызлар ял итсә не помешает конечно!

Реклама

Гөлия ханым Яңа ел ялларының бер өлешен май бәйрәмнәренә яисә отпускка өстәргә кирәклеген әйткән. Галина Дудкина да, бик озак яллар, дип аның белән килешә.

Әйтергә кирәк, Яңа елның 10 көнен дә ял итүчеләр сирәктер ул, кайсыннан гына сорама, инде 3 яисә 4 гыйнварда эшкә чыгуын әйтә. Арасында онлайн рәвештә хезмәт куючылар да җитәрлек. Шулай булгач, каникул дип лаф оруның нинди мәгънәсе бар соң? Өстәвенә, берөзлексез эшләүче завод һәм фабрикалар бар. Әлбәттә, бәйрәм каникулларында барасы җирләренә юл тотучылар да юк түгелдер. Яшерен-батырын түгел, үзем дә Чуаш республикасында һәм Удмуртиядә булдым, тик мин анда нишләргә белмәгәнлектән, вакыт күп булганга күрә бардым дисәм дә була, чөнки, ни дисәң дә, 3-4 көн ял иткәннән соң, организм эшкә тарта башлый. Озын сүзнең кыскасы – 10 көн ял итүнең файдасына караганда зыяны күбрәк. Кайсы яктан карасаң да шулай. Хөкүмәт органнарына Яңа ел каникулларын кыскартырга кирәк дигән тәкъдим җиткермәскә микән?

Рәсим Хаҗиев.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (2)
Осталось символов:
  • 16 гыйнвар 2022 - 11:52
    Без имени
    10 көн ял итүнең файдасына караганда зыяны күбрәк бу бик дөрескә туры килә. Кеше рәхәткә чыдый алмый шул. Борынгылар сүзе хак, хәрәкәттә бәрәкәт.
  • 10 гыйнвар 2022 - 19:13
    Без имени
    кайсыбер акыллы җитәкчеләр әле кешеләрне административ ялга дип җибәрделәр!!! 1 нче январьне эш урынында башладык без, аллага шөкер эшсез ятмадык, ун көн буена эштә үтте!