Кәрәзле телефон янәшәсендәге сперма бөтенләй хәрәкәтләнми!

Медицина фәннәре докторы Владислав Ившин билгеләп үткәнчә, соңгы елларда ир-атларда да, хатын-кызларда да гормональ үзгәрешләр еш күзәтелә.
– Симерү очраклары бик күп. Элек алар Вицин кебек булса, хәзер күбесе Моргуновка охшап калды. Ир-атларга тазарырга ярамый. Чөнки май катламы хатын-кыз җенес гормоннары бүлеп чыгара. Тора-бара алар ир-ат гормоннарыннан өстен чыга һәм нәселсезлеккә китерә.
Моннан тыш ирләрнең нәсел калдыру сәләтенә технологияләр дә зур йогынты ясый. Шундый тәҗрибә эшләп караганнар. Сперманы алып, икегә бүлгәннәр һәм термостатка салганнар. Берсенең янына кәрәзле телефон куйганнар.
Күпмедер вакыттан соң спермаларның активлыгын тикшергәннәр. Кәрәзле телефон янәшәсендә торганында хәрәкәтләнү бөтенләй беткән. Ә икенчесендә барлык функцияләр дә сакланган. 
Шуннан чыгып, ир-атларга киңәш бирәсем килә: кәрәзле телефоныгызны чалбар кесәсендә йөртмәгез. Телефон бик көчле радиомагнит импульслары бирә. 20 ел элек кәрәзле телефоннар булмады һәм спермаларның сыйфаты да күпкә яхшырак иде, – ди Владислав Ившин.

Фото: https://pixabay.com/ru