Мунчада ничек дөрес парланырга?

Парланырга кергәч, термометрга күз салырга онытмагыз. 80 градустан артмаган температурада парлану куркыныч түгел.
Башка шапка, кулларга бияләй киябез.

Биткә, муенга, терсәкнең бөгелә торган урыны, тез астына һәм зур кан юллары уза торган урыннарга себерке белән шап-шоп сугу дөрес түгел, җиңелчә генә суккалагыз.

Башыгызны һава күбрәк булган урынга, ә аякларны мич ягына куеп, аркага ятып парланыгыз.
Парланганда борын аша сулагыз, бигрәк тә эфир майларын куллансагыз.

Мунчага кергәнче, парланганда яки аннан соң салкын су эчәргә ярамый. Ул бөерләрне “суыта”. Бөерләр исә безнең тәндәге иң җылы ярата торган орган. Җылы су гына эчәргә кирәк. Аны исә бераз суынганнан соң эчегез, тән эссе вакытта эчү кайнар ташка су сибү кебек кенә була – суны организм кабул итми.
Һава кермәсен өчен мунча ишеген ныклап ябып кую да дөрес түгел. Анда һава һәм вентиляция булырга тиеш.

Саунада яки мунчада ятып парланырга, йә булмаса аякларны күтәреп утырырга тырышыгыз. Утырганда, кан әйләнеше бозыла. Башка эссе, ә аякларга салкын була.
Мунчадан соң ял итегез яки ятып торыгыз. Җылы тәннән табигый рәвештә чыгарга тиеш. Парланганнан соң йоклыйсы килү гадәти хәл.

Фото: http://pixabay.com