Пальтоны кул белән юу буенча КИҢӘШ

Ниһаять, көннәр җылытуга таба бара. Калган эшкә кар ява ди, болай да тоткарланып торган эшне хәзер эшләп куярга да була. Курткаларны кер юу машинасында курыкмыйча юасың. Ә менә пальтоны чистарту катлаулырак. Химчисткага биреп тә чистарттырып була анысы. Тик ул арзан хезмәт түгел, тагын нинди хәлдә кайтарып бирәләр бит әле. Кер юу машинасы да аның формасын боза. Димәк, бердәнбер юл - кул белән юу. Ваннага җылы су агызып, төймәләрен каптырып, пальтоны җайлап кына шунда сузып саласың. Суга сыек кер сабыны яки савыт-саба юа торган сыекча саласың. Артык каты булмаган щетка алып, шуның белән пальто йоны (ворс) юнәлешендә сак кына чистартасың. Аннары элгечкә элеп, душ ярдәмендә чайкатасың. Суы агып беткәч, балконга чыгарып эләсең.