«Һәр хатын-кызның үзен чибәр итеп күрәсе килә»

- Гүзәл, син үзеңә «матур» һөнәр сайлагансың. Визажист булу күптәнге хыялың идеме?
- Мин университетның юридик факультетын тәмамладым. Ә бу өлкәдә ун елдан артык эшлим. Косметика-парфюмерия дөньясы мине күптәннән кызыксындыра иде. Махсус курсларда укыдым, хәзер дә бер урында гына таптанмыйм, яңадан-яңа курслар ачылып тора, аларны да калдырмаска исәп. Миңа калса, бер генә хатын-кыз да матурлыкка битараф түгел. Һәр туташ һәм ханымның үзен чибәр итеп күрәсе, гармонияле һәм матур яшисе килә.
- Визажист һөнәренә сорау бармы соң?
- Бар. Матурлык индустриясе һаман алга бара. Хатын-кызларның да аңардан калышасы килми. Алар гына түгел, соңгы вакытта ирләр дә моңа тартыла башлады. Кеше үз кыяфәтенә күбрәк тә игътибар итә башлады кебек. Мин моны мода дип әйтмәс идем. Кеше тышкы кыяфәтенең зур күрсәткеч булып торуын аңлады. Шуңа да игътибар итәм: соңгы бер-ике елда хәтта олы яшьтәге ханымнар да килә башлады. Элек безгә 17-35 яшьлекләр генә килсә, хәзер 50, хәтта 60 ягындагы ханымнарга да макияж салабыз.
- Сезгә күбесенчә нинди максат белән киләләр?
- Төрлечә була. Берәр чарага барыр алдыннан да, үзләрен яңа образда күрәселәре килеп тә, гадәти көндәлек макияжга да киләләр. Бизәнүдән ниндидер яңа тәэсирләр алырга, рәхәтлек кичерергә теләүчеләр дә бар, чөнки өйдә үз-үзеңә макияж ясау - бер әйбер, ә визажист бизәндерү - бөтенләй икенче нәрсә.
- Гүзәл, бәлки безгә макияж ясаганда иң еш җибәрелә торган хаталарны да әйтеп үтәрсең...
- Фәлән кешегә салкын, фәлән кешегә җылы төсләр килешә, диләр. Мин моның белән бик үк килешеп бетмим. Бит төсе җылы булып, аңа макияжны салкын төсләр белән ясыйсы килә. Ул һәр кеше өчен шәхси. Кемгә нинди төс килешкәнен әйтер өчен, аның үзен күрергә кирәк. Теләсә кайсы макияжда бит тиресенең төсе тигез булу мөһим. Бизәнергә керешкәнче, иң элек битегезне чистартыгыз. Юынгач та тоник сөртегез. Аннары гына крем сылауга күчегез.
- Аларның да төрлесе бар бит: дымландыра, тукландыра торганнары...
- Дымландыру елның бөтен фасылында һәм бөтен яшьтә дә кирәк. Җыерчыклар иң беренче чиратта дым җитмәгәннән барлыкка килә. Кремнарның да төрле фасыл өчен чыгарылганнары бар. Дымландыра, шул ук вакытта салкыннан да саклый торган компонентлары булган кремнар сатыла хәзер. Тукландыргычмы, дымландыргыч креммы - анысы бит тиресенең нинди булуына бәйле. Бит тиресе юынгач та тартылган кебек булса, аңа дым җитми дигән сүз. Кубалакланса, кытыршы булып торса - тукландыргыч крем кулланыгыз. Кышын кремны урамга чыгарга кимендә бер сәгать кала сыларга кирәк. Атнасына бер-ике тапкыр дымландыргыч битлек ясарга да иренмәгез. Күп кенә хатын-кызлар гадәти кремны сылап бетерә дә шунда ук тональ крем сөртеп куя. Бу да дөрес түгел. Крем сеңеп беткәч, 20 минуттан соң гына сыларга кирәк аны. Югыйсә, гадәти крем белән бергә тональ крем да битегезгә сеңә.
- Тональ кремнан кала, сатуда тональ җирлек (тональная основа) тә бар. Ул шул ук тональ креммы?
- Аны тональ кремга кадәр сылыйлар. Ул мәҗбүри түгел, әмма аның макияжны мөмкин кадәр озаграк тотуын билгеләп үтәсем килә.
- Кершәнне шул тональ крем урынына гына кулланырга ярамыймы?
- Юк. Аны гадәти крем өстеннән сылап куйсагыз, бит тирегезгә зыян килергә мөмкин, чөнки кершән порошогы күзәнәкара кушылмалар эченә кереп тула. Тональ крем сөртмәгән очракта, кершәнгә кадәр тональ җирлек сылагыз.
- Тушьларга килгәндә, аның да керфекне озынайта яки купшыландырып торганы бар. Аларны ничек сайларга?
- Тушьны сайлаганда үзегез өчен уңайлы булган кисточкаласын алыгыз. Анысын дөрес сайлаган очракта керфекләрегезне озынайта да, купшыландыра да аласыз. Кыска нечкә керфеклеләр, купшыландыра торган тушь кулланып, күзләрен генә буяп бетерәләр, чөнки аларның кисточкалары, гадәттә, зур була. Тушь начар булды, коела башлады, диләр, эш тушьта түгел, ә аны ничә тапкыр сылавыңда. Тушьны өч-дүрт тапкыр сылаганда ул чынлап та коела башлый.
- Гүзәл, сиңа үз эшең ошыймы?
- Бик ошый, чөнки иң беренче чиратта мин кешеләрне яратам. Миңа алар белән эшләве кызык. Сиңа килгәндә алар бер, ә инде макияждан соң икенче төрле. Шул аерманы күрү мавыктыра мине.