#Киңәш сандыгы 24 января 2013, 08:02 Уку өчен 3 минут

Өйдә агач үстерәбез

24 января 2013, 08:02

Уку өчен 3 минут

Өй - хуҗабикәнең йөзе. Шуңа да һәркемнең аны матур, зәвыклы һәм үзенчәлекле итәсе килә. Ә аның өчен күпләр интерьерларына нинди дә булса үзгәреш кертергә тырыша. Кайвакыт гади генә бер картина, статуэтка яки чәчәк утыртылган ваза да йортны үзгәртеп куярга сәләтле бит. Шул исәптән топиарий да. Бу ни-нәрсә тагын дип уйга...

Скопировать ссылку

- Мария, топиарий нәрсә ул?
- Топиарий - интерьерны бизәү өчен төрле материаллардан ясала торган кечкенә генә агач. Күпләр аны якыннарына бүләк сыйфатында ала, кемдер үз фатирын бизәү өчен сатып ала. Чөнки ул йортка ямь кертү өчен үзенчәлекле аксессуар булып тора.
- Топиарий ясау өчен син нәрсәләр кулланасың?
- Аның өчен теләсә нинди материалны кулланырга була. Ясаучының фантазиясе генә булсын. Мине ул нәкъ менә шул ягы белән җәлеп итте дә инде. Кул астындагы бөтен әйберләр дә эшкә җигелә аны эшләгәндә. Ниндирәк композиция эшләргә була, нинди төсләр кулланырга, нинди материаллар сайларга, шуларны күз алдына китереп хыялга биреләсең. Мин үзем флористик органза, сүс, кипкән яки ясалма чәчәкләр, декоратив җиләк-җимеш, каһвә, төрле декор элементлары: атлас ленталар, күбәләкләр, муенсалар, пыяла мәрҗәннәр, шарлардан файдаланам. Санап та бетереп булмый, алар бик күптөрле.
- Агачны утыртыр өчен нинди чүлмәк сайларга киңәш итәсең?
- Ул топиарийның размерына һәм анда кулланыласы төсләргә ярашлы итеп сайлана. Нинди материалдан булуы мөһим түгел.
- Агачның ябалдашы өчен шар нинди булырга тиеш?
- Мин махсус пенопласт шар кулланам. Ә аңа беркетеләсе әйберләрне кайнар җилем ярдәмендә ябыштырам. Ул булмаса, шарны кул астындагы әйберләр белән ясарга мөмкин. Кәгазьләрдән йомарлам ясап, аны берничә тапкыр җеп белән уратып, күп итеп ПВА җилеме сылыйбыз. Монтаж күбеген дә файдаланырга була. Тик бу очракта шарны идеаль рәвештә тигез итеп эшләп булмый. Бер дә булмаганда, шулай итәргә кала. Тик мин шулай да махсус хэнд мейдны үз итүчеләр өчен эшли торган кибеткә барырга тәкъдим итәм. Кирәкле товарларны шуннан алырга була.
- Агачның «кәүсәсе» дә бар бит әле...
- Аның өчен теләсә нинди таяк бара. Таякны ябалдаш-шарга кайнар җилем белән беркетергә кирәк. Чүлмәккә исә гипс измәсе салып, шуңа таякны батырасың. Аннан инде үзең теләгәнчә бизисең.
- Заказлар бирәләр дидең. Сатып алырга теләүчеләр күпме соң?
- Күп. Бигрәк тә берәр бәйрәм алдыннан сорыйлар. Кешенең якыннарын үзенчәлекле бүләк белән сөендерәсе килә бит, шуңа да миңа мөрәҗәгать итәләр.
- Бәяләре ничегрәк?
- 1300дән алып 1500гә кадәр. Бу инде эшнең катлаулылыгыннан һәм нинди материаллар куллануыңнан тора.