Компьютерлар дөньясында кайнашабыз

Казанда “Корстон”да XIIIнче Бөтенроссия IT & Security Forum (ITSF) форумы ачылды. Әлеге чарада Россия төбәкләреннән һәм чит илләрдән мәгълүмати технологияләр өлкәләре белгечләре, цифрлы технологияләр юнәлешендә эшчәнлек алып бара торган 35 компания катнаша. Форумның максаты - цифрлы технологияләргә күченештәге мәсьәләләрне хәл итүгә, ИТ-технологияләрне куллану хисабына предприятиеләрнең эш нәтиҗәлелеген күтәрүгә, шулай ук предприятиеләрнең кибериминлеген тәэмин итү турындагы законнарның үтәлешенә булышлык күрсәтү, яңа алымнар барлау һәм үзара хезмәттәшлекне үстерү.

Татарстан Республикасы Премьер-министры Алексей Песошин да форумда әлеге фикерне әйтте.
- Республиканың IT тармагы үсешенең төп юнәлешләренең берсе-предприятиеләрнең цифрлы технологияләргә күчешенә шартлар һәм мөмкинлекләр тудыру, - диде Алексей Песошин. - Татарстан цифрлы икътисадка күчүдә иң уңышлы эшчәнлек алып бара торган төбәкләр исемлегендә.

Татарстанда технопарклар, IT-парклар, Иннополис фән шәһәрчеге, аның тирәсендә университет төзелеше алып барыла.

- Хәзер без бурычларыбызны яшь IT-компанияләргә ярдәм итүдә, шулай ук аларга эре предприятиеләргә үз чишелешләрен тәкъдим итү мөмкинлеге тудыруда күрәбез, - диде премьер-министр Алексей Песошин.

Пленар утырышта предприятиеләргә цифрлы технологияләр кертүдә дәүләтнең һәм корпоратив ачышларның роле турында фикер алышу булды. Корпоратив ачышлар дигәндә, мәгълүмати технологияләр өлкәсендә эшли торган предприятиеләрнең уртак проектлары турында сүз бара. Сөйләшүдә Татарстан Республикасы, “Росатом”, Ростелеком, Check Point, ICL Системные технологии җитәкчелеге вәкилләре катнашты.

Секцияләрдәге утырышларда “Дөньяда һәм Россия Федерациясендә хәвеф чыганаклары һәм аларны чишү алымнары”, “Финанс өлкәсендә цифрлы технологияләр”, “Цифрлы индустрия - 2019 ачышлары”, “Сәнәгать кибериминлеге” һәм башка темалар күтәрелде. Рифкать Миңнеханов җитәкчелегендә “Юл хәрәкәте иминлеге” дәүләт бюджет учреждениесе дә “Мәсьәләләрне чишү үзәге һәм мәгълүмати-техник система - цифрлы дәүләт элементы” дигән темага секция утырышы оештырды. Татарстанда юл хәрәкәте иминлеген тәэмин итүдә һәм транспорт хәрәкәтен көйләүдә электрон технологияләр киң кулланыш ала бара.

- Безнең форум 12 ел эчендә Россиядәге иң әһәмиятле һәм иң ихтыяҗлы чараларның берсенә әверелде. Экспертлардан уңай фикерләр ишетәбез. Эшкуарлык колачы үзгәрешен, яңа юнәлешләр барлыкка килүен еллар дәвамында күзәтеп киләбез. ITSF-беренче чиратта кешеләр ул, чөнки алар бүгенге заман технологияләрен тудыра, - ди ICL Системные технологии генераль директоры Айдар Гөзәеров.

Форум кысаларында цифрлы технологияләр күргәзмәсе дә эшли.

Автор фотолары