#Кыскача яңалыклар 13 сентябрь 2023, 18:54

Рөстәм Закировның кайгысын уртаклашабыз

13 сентябрь 2023, 18:54

Люция Мусина һәм Рөстәм Закировлар гаиләсе зур югалту кичерә. Рөстәм Закировның әнисе вафат булган. Бу хакта «Интертат» хәбәр итә.

Скопировать ссылку

Люция Мусина һәм Рөстәм Закировлар гаиләсе зур югалту кичерә. Рөстәм Закировның әнисе вафат булган.

Авыр хәбәрне социаль челтәрләрдә: «Әни, киттең… Урының оҗмахта булсын. Бик зур рәхмәт сиңа барысы өчен дә», – дип, аның тормыш иптәше, җырчы Люция Мусина җиткерә.

Разия апа инде өлкән яшьтә иде. Узган ел «Ирек мәйданы» газетасына биргән әңгәмәсендә Рөстәм Закиров әнисенең абыйсы белән килене тәрбиясендә булуын сөйләгән булган.

«Әнине 3 ел элек абый белән киленебез Лилия Урта Пошалымнан Мәтәскәгә үзләренә алып китте. Иң зур шатлыгым – ул ялгыз түгел, тиешенчә караулы. Абыйның хатынына зур рәхмәт! Төпчек бала буларак, аны без карарга тиеш булганбыздыр да... Әнигә 92 яшь тула. 84 яшенә хәтле җир җимертеп эшләде, икешәр үгез асрады, бәрәңге дә үстерде. Соңгы елларда биреште», – дигән ул анда.

Сәхнәдәш дуслары, язылучылары, дуслары Закировларның тирән кайгысын уртаклаша. «Разия апаның урыны оҗмах түрләрендә булсын», «Сезнең гаиләгезгә, якыннарыгызга күркәм сабырлыклар телим», «Әнине югалту – иң авыры. Якын кешегез өчен җәннәт ишекләре ачык булсын», – дип язып калдырган алар.

Кызыклы яңалыкларны күзәтеп бару өчен безнең МАХ каналына кушылыгыз.