Яңа сезонда театрлар ниләр белән куандырачак?

Театр яңа сезонга зур планнар, яңа идеяләр, премьералар белән атлый. Быел да алар традицияләренә тугры калып, театрның элеккеге режиссеры Марсель Сәлимҗанов истәлегенә һәм юбилеена «Санаулы кичләр» спектакле премьерасын әзерли.

Г.Камал исемендәге Татар дәү­ләт академия театры, татар театры тарихында беренче тапкыр, Санкт-Петербургтагы Александр теа­тры сәхнәсендә чыгыш ясаячак. Анда камаллылар узган сезондагы премьера­ларын – «Әтәч менгән читәнгә» спектаклен уйнарга ниятли. Чыгыш 12 октябрьдә, театрлар арасында уздырыла торган Олимпиада кысаларында булачак, дип белдерде театрның директоры Илфир Якупов.

Аннан камаллыларны Бухарест тамашачысы күрә алачак. Анда алар шулай ук фестивальдә катнаша һәм «Җәйнең бер көнендә» спектаклен тәкъдим итә.

Театр елы эзсез югалмый

Быел Россиядә Театр елы дип игълан ителгән иде. Татарстан театрларында ул әллә ни зур чагылыш тапмады да кебек. Бәлки без тамашачыларга гына шулай тоелгандыр. Камал театрына исә әҗере тими калмаган, шөкер! Театр елы ярдәмендә, хәзер республиканың авангард театры премьераларын республиканың башка шәһәрләрендә урнашкан кинотеатрларда да онлайн рәвештә карарга мөмкин булачак. Әлеге проектны тормышка ашыру өчен бюджеттан акча да бүлеп бирелгән.

Карап калырга ашык!

Театр – тере организм кебек. Ул гел үсештә, үзгәрештә. Шуңа да труппада яңа артистлар булу-булмавын әлегә кистереп кенә әйтә алучы булмады. Сезон барышында алар өстәлергә дә мөмкин, диде Илфир Якупов.
Репертуардан төшеп калачак спектакльләргә килгәндә, тамашачылар «Ут күршеләр»не, «Хуҗа Насретдин»не, «Әрем исе»н соңгы тапкыр карый алачак.

Лилия ЛОКМАНОВА