11 нче сыйныфлар өчен атнага бер яңа көн барлыкка килергә мөмкин

Ул бердәм дәүләт имтиханына нәтиҗәлерәк әзерләнү өчен кирәк диләр. Инициатива авторы – прогрессив белем бирү институты директоры Анна Маркс сүзләренчә, БДИга карата елдан-ел арта барган таләпләр аркасында укучылар үз шөгыльләреннән баш тартырга мәҗбүр. Моннан тыш, мәктәптә практик белем бирми һәм формаль характерда булган предметлар да бар, ди ул.

Алар өчен вакыт сарыф кына ителә. Укучыларның 72 проценты бу вакытны имтиханга әзерләнеп уздыру ягында. Шул рәвешле “үзлегеңнән белем алу” көнен профильле булмаган предметлар (тормыш иминлеге нигезләре, астрономия, крайны өйрәнү дәресләре) хакына кертмәкчеләр.   

Сүз уңаеннан: бердәм дәүләт имтиханнары узачак көннәр билгеле.
31 майда – географиядән
3 һәм 4 июньдә – рус теленнән
7 июньдә – математикадан
11 июньдә – тарих һәм физика
15 июнь – җәмгыять белеме
18 июнь – биология һәм язма чит тел
21 һәм 22 июнь – телдән чит тел
24 һәм 25 июнь – информатика
28, 29 июнь һәм 2 июль – резерв көннәр.
Имтиханнарның барысы да сәгать 10.00 да башлана.