2018 елның көзендә югалган егетнең мәетен тапканнар

Казанның Химиклар урамы янында чокырдан 1994 елда туган егетнең мәетен казып чыгарганнар, дип хәбәр итә Россиянең Татарстан Республикасы буенча Тикшерү комитеты.

Тикшерү комитеты сайтында хәбәр ителгәнчә, 8 гыйнвар көнендә хокук саклаучылар Химиклар урамындагы бер мәйданчыкта 1994 елда туган егетнең мәетен казып чыгарган. Бу егет 2018 елның көзеннән бирле эзләнүдә булган. Тикшерү нәтиҗәләре күрсәткәнчә, ул башына сугу аркасында үлгән. 

Аңа кадәр хокук саклаучылар 20 яшьлек шушы тирәдә яшәүче егетне тоткарлаган. Ул үзенең танышын үтерү турында гаебен үзе таныган, тикшерү эшләре башлангач, мәрхүмне күмеп куйган җирне дә күрсәткән. Тикшерүчеләр ачыклаганча, мәрхүм егет, бурычка акча сорап, танышы янына килә. Әмма алар ызгыша башлый һәм гаепләнүче кунак егетнең башына чүкеч белән суга. Соңгысы шунда ук җан тәслим кыла. Биш көннән гаепләнүче өе янындагы бер мәйданчыкта чокыр казый һәм мәетне шунда күмеп куя.

Тикшерү эшләре дәвам итә.