9 кешене үтергән Илназ Галәвиевны Мәскәүгә озатканнар

Казандагы мәктәптә укучы һәм укытучыларны үтергән Илназ Галәвиев Мәскәүдәге тикшерү изоляторына китерелгән. Бу хакта "Интерфакс" хәбәр итә.
Чыганак мәгълүматы буенча, гаепләнүче ике урынлы камерада урнашкан, үзен тыныч тота һәм агрессия билгеләре күзәтелми. Аның күршесе авыр тән җәрәхәтләре ясауда гаепләнә. Илназ Галявиев үз гаебен тулысынча таный.
Иҗтимагый күзәтү комиссиясе җаваплы сәркатибе Алексей Мельников хәбәр иткәнчә, җинаятьче башкала СИЗОсына 12 июньдә китерелгән.
"Галявиев үзе Казан изоляторында утырганда, теләсә нинди гамәл өчен - торырга, утырырга, башын кашырга рөхсәт алырга тиеш булган, дип раслый. Мәскәүдә дә аның артыннан катгый рәвештә күзәтәләр", - дигән Мельников.
Беренчел мәгълүматлар буенча, Галявиев Мәскәүгә психологик-психиатрия экспертизасы уздыру өчен китерелгән.

Билгеле булганча, Россия Президенты Владимир Путин Казандагы фаҗигадән соң мәгариф учреждениеләрендә иминлек мәсьәләсенә игътибарны көчәйтергә боерды.