9нчы майда Казанның җәмәгать транспорты ничек эшләячәк

Җиңү көнен бәйрәм итүгә әзерлек чорында һәм бәйрәм көнендә кайбер урамнарда транспорт чаралары хәрәкәтенә вакытлыча чикләүләр кертеләчәк. Транспорт хәрәкәтенең ничек оештырылачагы турында Казан Башкарма комитеты җитәкчесенең социаль өлкә мәсьәләләре буенча урынбасары Гүзәл Сәгыйтова сөйләде.

Шулай итеп, 4 нче майда 18:00 дән 23:00 гә кадәр Меңьеллык мәйданында, шул исәптән Профсоюз урамыннан Батурин урамына кадәр, транспорт хәрәкәте чикләнәчәк;

7 нче май көнне 16:00 сәгатьтән 22:00 сәгатькә кадәр Меңьеллык мәйданында да, шул исәптән Уң як Болак һәм Сул як Болак урамнары буенча Чернышевский урамына кадәр хәрәкәт ябыла;

8 нче майның 17:00 сәгатеннән һәм 10 нчы майның 2:00 сәгатенә кадәр, тантаналы чаралар үткәрү сәбәпле, Меңьеллык мәйданында хәрәкәт шулай ук тулысынча чикләнәчәк. Моннан тыш, 8 нче майның 18:00 сәгатеннән 9 нчы майның 22:00 сәгатенә кадәр Бондаренко урамы ябылачак.

Салют тәмамланганнан соң, кешеләр күпләп җыелган очракта, Сибгат Хәким урамын өлешчә ябарга мөмкиннәр.

Сәетгалиев һәм Мәскәү урамнары ягыннан җәмәгать транспортының махсус эше оештырылачак. 9 нчы майда метрополитен эш көне графигы буенча эшләячәк.

Бәйрәм узачак барлык объектларда да иминлек тәэмин итүгә бәйле тикшерү чаралары каралган. 8 нче май көнне финал репетициясеннән соң Меңьеллык мәйданында территорияне санитар эшкәртү үткәреләчәк. Бәйрәмнең барлык мәйданчыкларында санитайзерлар урнаштырылачак, медицина хезмәткәрләре кизү торачак.

Чыганак