Абау! Ун яшьлек кыз теш дәвалаганда үлгән

Бу турыда Россия Тикшерү комитетының Самара өлкәсе буенча Тикшерү идарәсенә сылтама белән РИА Новости хәбәр итте.

Тикшерү версиясе буенча, 8 августта Тольяттидагы шәхси клиникаларның берсендә ун яшьлек кызның тешендәге кариесны дәвалыйлар. Моның өчен ингаляцияле анестезия аппаратын кулланалар. 

Тикшерүчеләр белешмәсе буенча, наркоз бирүне туктатканнан соң, баланың йөрәк ритмы бозылуы ачыклана. Реанимация чаралары нәтиҗә бирми, бала вафат була.

Тольятти районара үзәк тикшерү комитеты җинаять эше ачкан. Экспертизалар билгеләнгән.

Икенче сыйныфта укучы Аня (исеме үзгәртелә) әтисе белән Казахстаннан Тольяттига туганнарына кунакка килә. Мәктәптә укулар беткәч, алар әтисе белән җәйге ялны биредә уздырмакчы була. Бу турыда «Комсомольская правда» хәбәр итте.

Кызганычка каршы, Аняның теше сызлый башлый. Кыз стоматологлардан бик курка. Шуңа күрә туганнары шәхси клиника таба. Яшь, матур табиблар, яхшы сервис — бар да идеаль кебек тоела.

8 августта кичке дүрттә Аняны теш табибы кабинетына алып кереп китәләр. Башта бар да тыныч була. Бераздан табиблар йөгерешә башлый, озак та үтми бала үлә.  Аняның мәетен экспертизага биргәннәр. Стоматология клиникасында әлеге вакыйга турында сөйләүдән баш тарттылар, диелә хәбәрдә. 

Чыганак: "Интертат"