Аның исеме мәңгелек: Россия Герое Марат Әхмәтшинга һәйкәл ачылды

Бу хакта “Татар-информ” мәгълүмат агентлыгы хәбәр итә.

Чарада Татарстан вице-премьеры Васил Шәйхразиев һәм Казан мэры Илсур Метшин катнашты. Тантанага шулай ук Марат Әхмәтшинның гаиләсе – әти-әнисе, хатыны, улы да килгән иде. Чарада катнашучылар Геройны бер минут тынлык белән искә алды, Казан танк училищесы курсантлары мемориалга чәчәкләр куйды.

- Бүген без якташыбыз Әхмәтшин Марат Радик улына һәйкәл ачабыз. Барлык кешегә дә тагын бер тапкыр аның үлемсезлеге мәңгелек икәнлеген күрсәтергә телибез, - диде Васил Шәйхразиев.
Марат Әхмәтшин турында “Шәһри Казан” газетасында да зур язма дөнья күргән иде. Моңа кадәр хәбәр итүебезчә, ул 113нче мәктәптә белем алган, Казан артиллерия училищесына укырга кергән, аны тәмамлаганнан соң Төньяк Кавказ хәрби округында хезмәт иткән. 2016 елда аны Сириягә җибәргәннәр. Шул ук елның 3 июнендә хәрби бурычын үтәгәндә, батырларча һәлак булган. Татарстанның Лаеш районы Атабай авылында җирләнгән.

Россия Президенты тарафыннан 2016 елның 23 июнендә кабул ителгән Указ нигезендә махсус бурычларны үтәгәндә күрсәткән батырлыгы өчен капитан Әхмәтшинга үзе үлгәннән соң Россия Федерациясе Герое исеме бирелде.

113 нче мәктәпкә дә Әхмәтшин исеме бирелде, Лаешта аның хөрмәтенә һәйкәл куелды.

Фото: kazan.kp.ru