Авырулар саны да, чирнең авыр формалары артачак...

Татарстанда яңа төрдәге коронавирус инфекциясе йоктыручылар саны артачак. Татарстан сәламәтлек саклау министры урынбасары Владимир Жаворонков «Татар-информ» агентлыгына шулай дип белдергән.

«Мин игътибарны авыру йоктырган пациентларның үсеш динамикасына бәйле факторга юнәлтәсем килә. Бу динамикадан күренгәнчә, әлеге саннар хәзергә бик ук зур булмаса да, теләсә кайсы эпидемиолог сезгә коронавирус инфекциясен йоктыручылар һәм чирнең авыр формалары саны тагын да артачагын әйтәчәк», — дип искәрткән министр урынбасары.

Ул билгеләп үткәнчә, хәзерге вакытта республика авыруның иң югары ноктасын узмаган һәм әле юлның башында гына тора.

«Шунлыктан ике моментны искәртәсем килә: динамика да, авырулар исәбе дә, чирнең авыр формалары саны да артачак. Кайбер очракларда авыруның үсеше бик кызу темпларда бара, күбесенчә шуннан сакланырга кирәк», — дип белдергән Жаворонков.