Балаларны «Шаян ТВ» тәрбияләячәк

– Каналның төп максатын Президент үзе билгеләде. Ул белем бирү, татар телен, мәдәниятен, гореф-гадәтләрен, тарихын популярлаштыру чарасы булачак, – диде Илшат Әминов.

1 февральдән «Шаян»ның кайбер тапшырулары «ТНВ-Татарстан» һәм «ТНВ-планета» каналларында эфирга чыгачак. Илшат Әминов сүзләренчә, бер елдан соң ул мөстәкыйль канал буларак эшләячәк. Эфирга чыгу өчен каналга шактый гына сумма акча кирәк.

– Финас ягы – иң авыр мәсьәләләрнең берсе. Башка каналлар белән көндәшлеккә сәләтле контент булдыру өчен зур акчалар кирәк. Сыйфатлы тәрҗемә генә дә зур суммалар сорый. Әйтик, «Халкыбыз мирасы» тәрҗемә студиясе безгә «Фиксиклар» мультфильмын тәрҗемә итте. 52 серияле, 12 минуттан торган әлеге мультфильм 2 миллион сумга төште. Без үз тәрҗемәләребезне дә эшләргә җыенабыз. Студиябез дә бар. Дөрес, барлык персонажларның тавышын тәрҗемә итү шулай ук кыйммәткә төшәчәк, – ди Илшат Әминов.

Татарчага тәрҗемә итү өчен япон мультфильмнарын алмакчылар. Япониядә, мәдәният елы уңаеннан, мультфильмнар «Шаян ТВ» өчен бушка биреләчәк. Ә тәрҗемә эшләрендә ярдәмгә эшсез калган татар теле укытучылары килергә мөмкин.
Каналда 20ләп оригиналь программа, татар телендә нәфис, фәнни-популяр фильмнар, мультфильмнар күрсәтәчәкләр. Алар белем бирү функциясен дә үтәячәк.

– Кызыклы проектларыбыз шактый, шуларның берсе – «Вәли» мультфильмы. улларын әти-әнисе, татар телен өйрәнсен дип, авылда калдыра. Малай белән төрле кызыклы вакыйгалар була. «Татарстан буйлап сәяхәт» дигән проект та уңышлы. Биредә Татарстанның үзенчәлекле урыннары турында сәяхәтнамә кебек сөйләячәкләр. Ләкин тәүлек дәвамында үзебезнең оригиналь тапшыруларны гына күрсәтә алмыйбыз. Шуңа күрә тапшырулар алты сәгать саен кабатланачак. Бу башка сәгать поясында урнашкан илләр өчен дә уңайлы булачак, – ди Илшат Әминов.

«Шаян ТВ» казах балалар телевидениесе үрнәгендә тормышка ашырылачак.
– Бүген Казахстанда телевидение һәм казах теле бик зур үсеш кичерә. Ил җитәкчеләре аларга зур акчалар бирә. Аларның матбугат министры ел саен төрле тапшырулар өчен грант уйната. Грантка лаеклы булганнарны бергәләп сайлыйлар, – ди җитәкче.

Балалар редакциясе «Болгар радиосы» бинасында эшли. Яңа каналны балалар һәм яшьләр өчен тапшырулар иҗат берләшмәсе җитәкчесе Рамилә Сәхабетдинова җитәкләячәк.