Болгар ислам академиясендә укырга теләүчеләрнең саны күп

- Хәзер укытучылар белән актив рәвештә сөйләшүләр бара. Якын арада алар безнең республикага килә башлаячак. Укытучылар, билгеле, зур галимнәр, дөнья күләмендәге мөгаллимнәр булачак. Бөек кешеләрне бөек шәхесләр тәрбияләргә тиеш. Программага килгәндә, алар барысы да эшләнгән. Хәзерге вакытта дәреслекләрне килештерү бара, аннан алар бастырылачак. Укытучылар белән сөйләшү уздырабыз, уку йорты үз вакытында ачылачак, башкача була алмый, - дип ышанычын белдергән Камил хәзрәт.

Аның сүзләренә караганда, республиканыкылардан тыш, биредә чит ил белгечләре дә укытачак. Аның берсе - Габдердазак Сәиди. Ул инде бер еллап безнең республикада укыта. Күпләргә таныш. Шулай ук Сәйф әл-Асри дигән укытучы белән сөйләшүләр алып барыла. Сириядән, Мисырдан галимнәр бар.

- Россия ислам уку йортлары турында сөйлибез икән, академия - шулар өстендә. Әгәр дә, әйтик, университетлар унлап икән, аны тәмамлаган кеше бакалавр дәрәҗәсен ала. Магистр яки доктор булу өчен аңа безнең академиягә килергә кирәк булачак. Дөнья буенча башка укыту академияләре белән чагыштырабыз икән, алардан кайтыш булыр дип уйламыйбыз, әйбәтрәк тә булыр, бәлкем, - дигән мөфти.

Хәзерге вакытта академиягә укучылар туплана. Укырга теләүчеләр шактый күп булып чыккан. Бирегә укырга керер өчен билгеле бер шартлар бар. Ул бакалавр булырга, югары ислам белеме алган булырга тиеш. Күп кенә мөхтәсибләр, имамнар Россия ислам университетын тәмамлаганнар, шунлыктан әзер укучыларыбыз күп. Биредә уку өчен Татарстаннан гына түгел, бөтен Россиядән, Кавказдан да, Идел буеннан да, үзәк районнардан да киләчәкләр.

- Академия динебез өчен дә, илебез өчен дә, гарәп илләре белән элемтәләр өчен дә кирәк. Аның Татарстанда булуы бигрәк тә мөһим. Болгар ислам академиясен оештыруны Россия Президенты Владимир Путин да хуплады, - дигән Камил хәзрәт.

Мөфти сүзләренчә, 20 майда узачак Болгар изге җыенына баручылар академия төзелешенең нинди стадиядә булуын күрә алачак. Төзелеш эшләре көзгә тәмамланачак. 25 студент агымдагы елның 1 сентябрендә укый башлар дип көтелә.