Бозыммы? Билгесез кешеләр фотолары сибелгән кырмыска күче табылган

Нефтекама шәһәре янында гадәти булмаган кырмыска оясы табылган. Урман бөҗәкләре торагында билгесез кешеләрнең дистәләгән фотосурәтләре ята. Сыйфаты буенча фикер йөрткәндә, алар социаль челтәрләрдәге сурәтләрдән бастырылып алынган.

Янәшәдә вафли, ботка һәм, әрчелеп, икегә ярылган йомыркалар ята.

"Без гөмбә җыярга чыккан идек, шәһәрдән ерак китмәдек, менә шундый кырмыска оясына тап булдык. Бозымга охшаган", - ди биредә яшәүче Алинә.

Кайбер кешеләр моны борынгы «нарядка» йоласы ди. Кемдер бу ритуал кешене танымаслык итеп үзгәртергә сәләтле, дип ышана. Дөрес, моңа дәлилләр юк, әлбәттә.

Ритуалның асылы гади: кемнеңдер матурлыгын алырга теләгән кешеләрнең фотосурәтләрен кырмыска оясына китерә. Гадәттә, моны кызлар көндәшләренә бозым салу өчен эшли, диләр.

Кем баласы гөнаһ җыеп йөри икән инде...

"Әгузү билләһи-минәш-шәйтанир-раҗим. Бисмилләһир-рахмәнир-рахим". Шушы изге сүзләрне онытмасак, шайтан гамәле чебеннән дә кечерәк булып калачак, диелә изге Коръән Кәримдә. Бу очракта, кырмыскадан да, дип яза "Кызыл таң" газетасы.

"Шәһри Казан" газетасы моңарчы әлеге тема буенча язып чыккан иде, укырга: Өшкерүче Фәрит хәзрәт: «Җеннәр кешегә гашыйк булып та керә»

Фото: http://pixabay.com