«Даруль-ифта» мөселман сall-үзәгенә ярты ел эчендә 5 меңгә якын мөрәҗәгать кабул ителгән

Тулы булмаган 8 ай эчендә нәзарәтнең шәригать белгечләре Россиянең төрле почмакларыннан – Татарстан, Башкорстан республикаларыннан, Чиләбе, Омск, Оренбург өлкәләреннән, Мәскәүдән һәм башка төбәкләрдән килеп ирешкән 5000гә якын мөрәҗәгатьне кабул итте.

Белгечләр бер айга уртача 650 шалтыратуга җавап бирергә өлгерә, бу исә бер көнгә якынча 30 мөрәҗәгатьне карау дигән сүз.

Күп каналлы телефон линиясенә кабул ителгән мөрәҗәгатьләр статистикасына караганда, сорауларның күпчелеге дини характерга ия. Әйтик, рамазан аенда мөселманнарны ураза тоту, фитыр, фидия сәдакаларын, зәкят түләүгә бәйле сораулар кызыксындырса, бүгенге көндә халык өчен намаз, никах һәм талак мәсьәләләре, исламда ир-атның һәм хатын-кызның бурыч-вазифалары, ипотека һәм рассрочка, кредит картасына кагылышлы сораулар, кыямәт көне, гаурәтне каплау, риэлтор эшчәнлегенең рөхсәт ителү-ителмәве, теге яки бу дини йоланы башкару тәртибе һәм башка бик күп шәригать мәсьәләләре актуаль булып тора. Шунысы игътибарга лаек: барлык мөрәҗәгатьләрнең 60 проценты ир-атларга туры килә. Телефон консультациясенең уртача озынлыгы 2-3 минутны тәшкил итә.

Искәртеп үтик: «Даруль-ифта» – шәригатьнең теге яки бу мәсьәләләре буенча фәтвалар чыгару өчен ТР МДН тарафыннан махсус булдырылган күпканаллы call-үзәк. Теләге булган һәркем эш көннәрендә сәгать 10.00нан 16.00га кадәр 8 800 222 7667 номерына шалтыратып, үзен борчыган сорауларга җавап алырга мөмкин.

Халык белән тыгыз элемтәдә торуга Татарстан мөфтиятендә өстенлекле игътибар бирелә. Нәзарәткә төрле сораулар белән читтән торып мөрәҗәгать итү өчен берничә мөмкинлек булдырылган. Мисал өчен, 2018 елда Рамазанның беренче көннәреннән үк Татарстан Республикасы мөфтиенең «Дини сорау» яңа консультатив интернет-линиясе үз эшен башлап җибәрде – мөселманнар шәригать буенча кызыксындырган сораулар белән махсус булдырылган e-mail: dini.sorau@tatar.ru аша Камил хәзрәт Сәмигуллинга шәхсән мөрәҗәгать итә ала.

Аңа ТР мөселманнары диния нәзарәте рәсми сайтының махсус «Мөфтигә сорау» сәхифәсе аша да сораулар җибәрергә була. Ислам тематикасына кагылышлы сорауларга җавапларны диния нәзарәтенең Ышаныч телефонына шалтыратып та алырга мөмкин: +7 939 50 50 700.

Фото: dumrt.ru