Дөнья чемпионатына Казанда тагын дүрт футбол базасы ачыла

Татарстан Республиксының төзелеш, архитектура һәм торак-коммуналь хуҗалыгы министры урынбасары Владимир Кудряшев сүзләренчә, 2018 елда узачак Футбол буенча дөнья чемпионатына Казанда тагын дүрт футбол базасы ачыла. Биредә инде спортчылар әзернәнеп кенә калмый, яшиячәк тә.

- Базаларның өчесе инде 60-70 процентка әзер. Август аенда биредә төп эшләрне тәмамларга тиешбез. Әле газонның җиргә ияләшәсе бар, шуңа да аны язга калдырмау мөһим, - диде Владимир Кудряшев.
Әлеге яңа базаларны һәм резерв буларак бер искесен дөнья чемпионатында кулланачаклар.

Конфедерацияләр Кубогы барган вакытта исә футболчылар "Рубин", "Электрон" һәм Үзәк стадионда әзерләнә. Бу базаларга һәм "Казан-Арена" стадионына ФИФА таләпләре буенча үзгәрешләр кертелгән.
Дөнья чемпионатына стадион үзгәрешсез калачак. Бары - медиа, стюардлар үзәге һәм вакытлы трибуналар гына зурайтыла.

Сүз уңаеннан, "Казан-Арена"да булган соңгы матчларда стадион үзәгендә махсус камералар урнаштырылган. Алар җанатарларны да якынайтып төшерергә сәләтле. Тәртип бозганнарны исә Fan-ID паспорты аша табачаклар.