"Экстремистлар яшьләрне ки­лә­чәкләреннән мәхрүм итә, аларда алдагы көннәренә өмет-ышанычларын бетерү өстендә эшли"

Казан илкүләм тикшеренү технология университетында терроризм һәм экстремизмга каршы тору темасына «Тынычлык территориясе» дигән кейс-чемпионат узды. Студентлар арасында мондый юнәлештәге түгәрәк өстәлләрне «Татарстан иҗади яшьләр академиясе» берләшмәсе Яшьләр эшләре һәм спорт министрлыгы белән берлектә оештыра.

- Узган елны без әлеге чараны башка форматта уздырдык - экспертлар чакырдык. алар студентларга лекцияләр укыды. Быел исә студентларның үзләрен тыңларга булдык. Аларны биш төркемгә бүлеп, һәркайсына фикер алышу өчен берәр тема бирдек, - дип сөйләде безгә Терроризм һәм экстремизм буенча республика яшьләр программасы җитәкчесе Сабина Вафина.

Яшьләр «Интернет челтәрендә терроризм», «Халык арасында ыгы-зыгыны бетерү», «Террористларны вербовкалау», «Наркотрафикка каршы тору», «Террор характерындагы ялган хәбәрләр» темасына фикер алышты, терроризм һәм экстремизм идеяләре таралуга каршы көрәш ысуллары турында сөйләштеләр.

Түгәрәк өстәлгә эксперт буларак Татарстанда терроризмга каршы комиссия аппараты җитәкчесе Илдар Галиев тә чакырылган иде. Ул билгеләп үткәнчә, экстремизмга һәм терроризмга каршы көрәш максатыннан, яшьләр арасында бу афәтләрне кисәтү эшчәнлеген даими алып бару сорала.
- Экстремистлар яшьләрне ки­лә­чәкләреннән мәхрүм итә, аларда алдагы көннәренә өмет-ышанычларын бетерү өстендә эшли. Яшьләрне экстремистик оешмаларга җәлеп итү алар өчен ансатрак. Димәк, яшь буын үзен алардан сакларга тиеш. Террорчылык ул - кешелекне юкка чыгаручы афәт, - диде ул.

Шулай ук эксперт буларак чакырылган Татарстан Фәннәр академиясенең Исламны өйрәнү үзәге хезмәткәре Валерий Горшунов фикеренчә, яшьләр арасында экстремизм һәм терроризм идеяләрен таратуда интернет челтәренең тискәре йогынтысы зур.

- Укымаган, эшсез йөргән, кесә­сендә акчасы булмаган, башка социаль проблемаларын хәл итә алмаган, җәмгыятьнең үзенә карата тискәре карашын сизгән яшьләр көннәрен интернетта уздыра. Төрле радикаль оешма әгъзалары андыйларны социаль челтәрләрдән эзләп кенә утыра. Башкаларга үзен кирәкмәгән дип санаучылар анда үзләренә «иптәш» тә таба. Шуннан радикаль оешмаларга да кереп китә, - ди ул.

Валерий Горшунов соңгы вакытта балалар арасында киң таралган, аларны үз-үзләренә кул салуга этәргән «Зәңгәр кит» интернет-уенын да искә алды.
- Мондый уеннарга каршы тору өчен дәүләт югарылыгында ниндидер бер позитив кызыклы уен уйлап чыгарырга кирәк, - ди ул.