Европа галимнәре татарлар тарихын өйрәнә

Анда төрле ил галимнәре бергәләп язган «Дөнья тарихында Алтын Урда» дигән китапны тәкъдим итү булган. Әлеге конференциядә катнашкан Татарстан республикасы Фәннәр академиясенең Мәрҗани исемендәге тарих институты директоры, тарих фәннәре докторы Рафаэль Хакимов "Татаринформ" мәгълүмат агентлыгында узган матбугат конференциясендә Оксфордка зур галимнәрнең нәкъ менә шул теманы ныклап өйрәнү өчен махсус җыелуын әйтте.

Әлеге китап һәм җиде томлы "Татар тарихы" китабы ТАИФ акционерлык оешмасының матди ярдәме белән инглиз теленә тәрҗемә ителгән. Журналистлар белән очрашуга тарих фәннәре докторы Радик Салихов, Миркасыйм Госманов исемендәге Алтын Урда һәм татар ханлыкларын өйрәнү үзәге җитәкчесе, тарих фәннәре кандидаты Илнур Миргалиев, тарих институтының гыйльми секретаре, тарих фәннәре кандидаты Бәхтияр Измайлов та килгән иде. Алар каләм ияләренең һәм онлайн тамашачыларның күп кенә сорауларына җавап бирделәр.

Галимнәрне озатканда Президентыбыз Рөстәм Миңнеханов Европада беренче һәи икенче бөтендөнья сугышларында һәлак булган татар сугышчыларының каберләрен дә эзләп карарга кушкан булган.

- Без бу эшне республика зиратларын өйрәнүдән башлаган идек. "Исәннәрнең кадерен, үлгәннәрнең каберен бел!"- диләр бит. Күп кенә кабер ташларын ачыкладык. Ә иртәгә Германиягә сәяхәткә кузгалабыз, - диде Тарих инситутының фәнни эшләр буенча директор урынбасары Радик Салихов. - Башта Көнбатыш Германиягә барырга җыенабыз, аннары башка якларына да. Анда милләттәшләребез күпләп ятып калган. Әлеге проект өч-дүрт елга сузылып, хәбәрсез югалганнарның исемнәрен туганнарына кайтарып бирергә җыенабыз.

Изге эшләрендә уңышлар юлдаш булсын. Бүгенге көндә мәрҗәнилеләр бар дөньяга танылган атаклы тарихчылар белән бергәләп "Европада татар тарихы" дигән зур хезмәтне нәшер итәргә әзерлиләр. Әлеге хезмәтләр "татар - кыргый» дигән мифларны таратып, тарихи чынбарлыкны өскә калкытырга, халкыбызны уңай яктан танытырга ярдәм итәр.