Игътибар үзәгендә – хостеллар

Татарстан Президенты каршындагы Эшмәкәрлек буенча советның киңәйтелгән утырышы узды. Чарада катнашкан Рөстәм Миңнеханов эшмәкәрләр белән республикада кече бизнесны үстерү мәсьәләләре турында сөйләште. Бизнес белән хакимият арасында турыдан-туры элемтәне тәэмин иткән әлеге советның проектлар төркеме эшенә теләгән һәр эшмәкәр кушыла ала. Проект төркемнәре конкрет проблема яки мәсьәләне күз алдында тотып оеша. Бу юлы совет утырышының игътибар үзәгендә хостеллар эшчәнлеге булды.

Татарстан Россиядә кунакханә хезмәтләре күрсәтү өлкәсендә алга киткән төбәк санала, кунакханә базарындагы вазгыятьне билгеләүче күрсәткечләр буенча Идел буе федераль округында беренче булып тора. Республика килгән кунак­ларның саны буенча да беренче бишлеккә керә. Бүгенге көндә урта класска исәпләнгән туристлык инфраструктурасын һәрьяклап үстерү перспективалы юнәлеш булып тора. Россиянең эре шәһәрләре арасында иң беренче булып хостеллар Казанда барлыкка килде. Бу өлкәдә Казанның тәҗрибәсе зур. Шул уңайдан Татарстан хостеллар турында федераль закон проектына җитди төзәтмәләр әзерләде. Документ июнь башында беренче укылышта кабул ителде. Ул хостелларны торак йортларда ачуны тыя. Бу исә бизнес вәкилләре арасында җитди резонанс тудырды. Казан эшмәкәрләре Дәүләт Думасы депутаты, «Бердәм Россия» фракциясе әгъзасы Александр Сидякиннан кунакханәләрне торак йортта урнаштыру турындагы законны караганда аларның мәнфәгатьләрен истә тотуны сорады. Уртак көч белән, торак йортларда яшәүчеләрнең дә, эшмәкәрләрнең дә мәнфәгатен якларлык вариантлар табылды. Төзәтмәләр хостелларны торак йортта ачу өчен ике төрле шартны үтәүне күз алдында тота. Алар: торак йортта яшәүчеләрнең ризалыгы һәм кунакханәләрнең суга, утка аерым счетчигы булу. Шул рәвеш­ле ике якның да мәнфәгате исәпкә алына. Закон проектын Дәүләт Думасының яңа составы караячак.

^{_{Фото: hotel-inn.ru}}