Ирек Зиннуров: «Туган телләрне онытырга ярамый»

Татарстаннан Эльмира Кәлимуллина, Екатерина Скулкина, Эльмир Нәбиуллин, Сергей Рыжиков, Алексей Морозов, Нюша (Анна Шурочкина) шулай ук чемпионат илчеләре.
– Чемпионат илчеләре буларак без спортны пропагандалыйбыз. Мәктәпләрдә очрашуларда булам. Балалар да спорт белән кызыксына, спорт чараларын күзәтеп бара. Хәтта кызлар да спорт, футбол турында биргән сорауларыма төгәл җавап кайтара. Үзләре дә бик җитди сораулар бирәләр, спорт илчесе булу җиңел генә әйбер түгел ул, – ди Ирек Зиннуров.

Мәктәпләрдәге очрашуларда өлкән сыйныфлар укучылары волонтер булырга теләк белдерә икән.
– Волонтерлык хәрәкәте бик мөһим. Халыкара спорт чаралары оештырганда, аларның ярдәме зур, – диде Ирек Зиннуров һәм истәлекләргә бирелеп дәвам итте. – Казанда элек бер «Оргсинтез» бассейны бар иде, ул 50 метрлы. Хәзер башкалада 50 метрлы бассейннарны санап бетергесез. Хәтерлим, «Оргсинтез» бассейны хезмәткәрләре, башка бассейннар ачылгач, үзләрендә кеше бетәр, дип шикләнгәннәр иде. Кая ул кимү, бассейнга йөрүчеләр саны тагын да артты. Казан, чын мәгънәсендә, спорт шәһәре. Мәктәпләрдә спорт секцияләре күбрәк булсын иде, әлбәттә.
Бер очрашып сөйләшкәндә, Ирек әфәнде: «Татар телемне каты гына өйрәнә башладым әле», – дигән иде. «Телне өйрәнүдә уңышлар бармы?» – дип сорадык.

– Татар телен оныттырмас өчен, әти мине бала чакларымда Кызыл Байрак авылына кайтара иде, – дип русчалап-татарчалап җавап кайтарды Ирек Зиннуров. – Ләкин миңа төрле шәһәрләрдә яшәргә һәм эшләргә туры килде, туган тел онытылды. Дәүләт Думасында телләр турындагы закон бик үк уңышлы түгел дип саныйм. Закон туган телләрне өйрәнүне ирекле рәвешкә куя. Ирекле булса, бала ул дәрескә керми, ата-аналар да ВУЗ өчен кирәкле фәнне сайлый. Телне өйрәнү ирекле булса, телне онытачакбыз, мин – моның мисалы. Тагын да аянычлысы: без татар теле белгечләрен югалтачакбыз. Мин туган телемне өйрәнүне дәвам итәм, тик аны бала чакта ук эшләргә кирәк. Туган тел бер татарларга гына кагылмый, Россиядә туган телләр күп бит.
Ирек Зиннуров Футбол буенча дөнья чемпионатында Россия командасына уңышлы чыгыш теләде.

Ирек Зиннуров – 2000 һәм 2004 елларда Олимпия уеннары призеры. Казанның «Синтез» су полосы командасының элекке капитаны. «Синтез» командасы составында «Len Trophy» Кубогы, Россия Кубогы, Россия чемпионаты җиңүчесе. Танылган спортчы бүген «Бердәм Россия» сәяси партиясеннән Россия Федерациясе Дәүләт Думасы депутаты.