Кабатлавыгызны сорыйбыз: ата-аналар балаларын мәктәпкә җыю өчен акча көтә

Мәктәп яшендәге балаларның әти-әнисе Россия Президенты Указы буенча узган елда тәкъдим ителгән финанс ярдәменең кабатлануын көтәләр. Исегезгә төшерәбез, 2021 елда Путин йөкләмәсе буенча 6 яшьтән 18 яшькә кадәрге балаларга 10 000 сум күләмендә бер тапкыр бирелә торган акча бүлеп бирелгән иде. Мондый пособиене ел саен түләү турындагы мәсьәлә карала, әмма әлегә бу карар буенча бернинди рәсми игъланнар юк. Шуңа күрә Россия әти-әниләре петиция бастырган.

«Россиядә югары инфляция булу сәбәпле, 2022 елда көндәлек ихтыяҗ тауарларына бәяләр артты. Чит ил санкцияләре кертелү сәбәпле, бик күп предприятиеләр ябылды һәм кешеләр эшсез калды. Әти-әниләргә балаларны мәктәпкә әзерләү кыенрак: канцтоварлар сатып алу, өстәмә уку әсбаплары һәм эш дәфтәрләре, мәктәп формасы, спорт формасы, аяк киеме, сыйныф ихтыяҗлары өчен акча бирү һ.б. күп кенә балаларга репетиторлар, өстәмә түгәрәкләр һәм секцияләр таләп ителә. 2021 елда Президент йөкләмәсе буенча мәктәп яшендәге (6 яшьтән алып 18 яшькә кадәр) балаларның әти-әнисе мәктәпкә әзерлек өчен бер тапкыр бирелә торган түләүләр алды, алар Россия гаиләләре өчен бик яхшы ярдәм булды. Мәктәп укучыларының барлык әти-әнисе исеменнән ярдәм өчен рәхмәт белдерәбез һәм 2022 елда баланы мәктәпкә әзерләү өчен 10000 сум күләмендә бер тапкыр бирелә торган түләүне кабатлавыгызны сорыйбыз», - диелә петициядә.

Узган ел шундый төр түләүне август аенда күчерә башладылар. Пандемия белән бәйле икътисади проблемалар шартларында яңа түләүләр ата-аналарга балаларны мәктәпкә җыярга ярдәм итте. 

Федераль дәрәҗәдә бу түләүләрне ел саен үткәрү өчен тәкъдимнәр күп тапкырлар яңгырады. 2022 елда һәр укучыга 10 000 сум турында карар әле яңгырамады. Әмма кайбер экспертлар бу хәл июль ахырына кадәр хәл ителер, дип саный.