Казан балалар бакчаларында QR-код белән генә кертәчәкләрме?

Казандагы балалар бакчаларында QR-код белән генә керергә мөмкин булачак, дигән хәбәр дөрес түгел. ТР Мәгариф һәм фән министрлыгы шулай дип белдерде. Мондый карар 8 ноябрьдән гамәлгә керәчәк дигән мәгълүмат чынбарлыкка туры килми.
“ТР Мәгариф һәм фән министрлыгы да, Казан Башкарма комитетының мәгариф идарәсе дә балалар бакчалары территориясендә ата-аналарны бакчага кертү буенча бернинди күрсәтмәләр дә бирмәде", - дип хәбәр иттеләр ведомствода.
Балалар өчен үткәрелә торган бәйрәмнәргә килгәндә, аларга вакцинация турында QR-кодлы яки ярты ел эчендә коронавирус кичерү хакында белешмәсе булган әти-әнинең берсе килә ала. Барлык өлкәннәр дә керү юлында термометрия уза, залда утырганда социаль дистанция сакларга тиеш.
Моннан тыш, 60 яшьтән өлкәнрәк затларга, шулай ук башка төркемдәге балаларга керү тыела.