Казанда – Кыргызстан мәдәнияте көннәре үтә

- Мәгълүм булганча, күптән түгел Россия Президенты Владимир Путин белән Кыргызстан Президенты Алмазбәк Атамбаев очрашты. Шушы очрашу кысаларында, Россиядә мәдәният көннәрен оештырырга булдык. «Россиянең кайсы субьектларында булырга телисез?» - дигәч, без беренче чиратта Татарстанны күрәсебез килүе турында әйттек. Татарлар Кыргызстан мәдәнияте үсешендә зур роль уйный. Чыңгыз Айтматовның әнисе Нәгыймә апаның татар милләтеннән икәнен барыбыз да яхшы белә, - диде кинорежиссер, продюсер, Кыргызстан кинематографистлары берлеге рәисе Садык Шер-Нияз.

Чараларның бер өлеше Мәскәүдә 20 июнь көнне узган инде. Татарстаннан кала, мәдәни чаралар тагын Башкортстанда уза. Садык әфәнде әйтүенчә, алар Казанга иң яхшы җырчылар - Кыргызстанның атказанган артисты, баш дирижер Рәхәтбәк Осмоналиев җитәкчелегендәге Зур дәүләт симфоник оркестры белән килгән. Концерт бүген Салих Сәйдәшев исемендәге Зур концерт залында 19.00 сәгатьтә башлана. Биредә Кыргызстанның халык артисты Кәрим Турапов, атказанган артистлары Эльнур Самарбәков, Бактыбәк Ыбыкеев, халыкара конкурслар лауреатлары Заир Райымбәков, Айзирәк Момунова һәм башкалар башкаруында классик оперетталар һәм эстрада җырлары яңгыраячак.

Шунысын да искәртеп узарга кирәк: мондый чаралар Россиядә зур масштабта соңгы тапкыр 2003 елда үткәрелгән булса, Татарстанда бөтенләй уздырылмаган.

- Советлар Союзы заманында Кыргызстан мәдәнияте зурлап - декада буена бара иде. Ул вакытта 300 артист килгәнлеге истә калган. Миңа калса, мондый зур масштабта уза торган вакыйга шул заманнардан бирле уздырылмады. Казан безнең өчен кадерле. Тарихка күз салсак та, Кыргызстанның беренче дәреслекләре Казанда бастырылган һәм нәшер ителгән. Шуңа күрә Казан бездә һәрвакыт зыялы, рухи кыйммәтләр шәһәре буларак күзаллана. Гомумән, кыргызлар белән татарларны тел, дин, мәдәният берләштерә, - диде Садык Шер-Нияз.
Татарстанда Кыргызстан мәдәнияте көннәре координаторы Дарика Асылбашева әйтүенчә, «Хәзинә» милли сәнгать галереясы бүген 15.00 сәгатьтә ачыла һәм ул ун көн дәвамында эшләячәк.

Шулай ук «Мир» кинотеатрында да кыргыз кинофильмнары күрсәтеләчәк. Анда 2015 елгы Казан халыкара мөселман кинофестиваленең «Иң яхшы тулы метражлы фильм»ы булып танылган «Курманжан Датка» картинасын, Ник Жолдошевның - «Сутак», Руслан Акунның - «Перегон» һәм Нәргизә Маматкулованың «Сөйкө» фильмнарын карап булачак.
Кунак ашы - кара-каршы, дигәндәй, киләчәктә Кыргызстанда да Татарстан мәдәнияте көннәре узачак.