Коронавирус таралу куркынычы аркасында Мәскәүне ябарлармы? 

Мәскәү мэры Сергей Собянин белдергәнчә, шәһәрне COVID-19 таралу куркынычы аркасында ябарга планлаштырмыйлар. Бу хакта ул "Россия 1" телеканалына хәбәр итте.

Шул рәвешле шәһәр башлыгы башкалада коронавирус пандемиясе белән бәйле катгый чикләү чаралары кертү турындагы сорауга җавап бирде. Аның сүзләренчә, авыру әле китмәгән, һәм чит илләрдә дә катгый чаралар кертелә, әмма Мәскәүдә тагын да кырысрак чаралар кертү әлегә күздә тотылмый.

Собянин ассызыклаганча, сәламәтлек саклау системасы әлегә агымдагы вәзгыятьне хәл итә.

Элегрәк Собянин хәбәр иткәнчә, агымдагы атна башыннан Мәскәүдә коронавирус белән вәзгыять кискенләшә башлаган, бу чир йоктыру һәм авыруларны хастаханәгә салу очракларының сизелерлек артуыннан күзәтелә. Ул соңгы ике көндә яңа ачыкланган очраклар үсеше кимеде, дип тә өстәде. Вәзгыятьне тотрыкландыруда битлек режимын үтәү һәм офис хезмәткәрләренең бер өлешен читтән торып эшләүгә күчерү, шулай ук дистанцион уку ярдәм иткән.

Фото: http://pixabay.com