Ксения Собчак юл һәлакәтендә исән калган кызга фотостудия бүләк иткән

“Оксана Садовник белән безне язмыш аяныч рәвештә очраштырды. Икебез дә авария корбаны булдык. Үз хәлемә кайткач та, шундук Оксана белән элемтәгә кереп, аңа ничек ярдәм итә алуым турында сорадым. Ул гомере буе фотостудия турында хыяллануын әйтте. Оксана – талантлы һәм текә фотограф”, - дип сөйләгән Собчак.

Шулай итеп, Собчак фотостудия чыгымнарын, ягъни 1,1 млн.сумны тулысынча үзе каплаган. 

Исегезгә төшерәбез, юл һәлакәте узган ел октябрьдә Сочи шәһәрендә булды. Собчак утырган Mercedes S 500 автомобиле каршы як полосасына чыгып, Volkswagen машинасына бәрелгән. Нәтиҗәдә Volkswagen машинасының 35 яшьлек пассажиры һәлак булган. 28 яшьлек йөртүче белән 29 яшьлек Оксана Садовник төрле тән җәрәхәтләре алган. Собчак исә авария урыныннан башка машинада китеп барган.