Кукмарада коточкыч фаҗига: абыйсы энесен пычак белән кадап үтергән

Кукмара районының Княгор авылында коточкыч фаҗига була. Бер җирдә дә эшләмәүче, элегрәк хөкем ителгән 52 яшьлек ир-ат, 44 яшьлек энесе белән бергә спиртлы эчемлекләр кулланганнан соң, кинәттән килеп чыккан гауга вакытында туганының күкрәк өлешенә пычак белән яра ясый.

Алынган тән җәрәхәтләреннән ир кеше урында ук вафат була. Әлеге җинаятьне кылуда шикле булган ир кеше полициянең җинаятьчеләрне эзләү бүлеге хезмәткәрләре тарафыннан тоткарланды, дип хәбәр итә "Хезмәт даны" газетасы.