Күзне каплаган килеш концерт карарга чакыралар

“Я вижу сердцем. Моя Якутия” дип аталган тифлоконцертта эстрада җырлары белән бергә халык җырлары башкарылачак, милли уен корал хомус тавышын ишетеп булачак. Шул рәвешле җырчыны күрмичә генә, тавышлар ярдәмендә алар образларны үзләре тудырачак. Күз белән күрмичә дә, йөрәк белән кабул итеп була, ди оештыручылар. 
Инклюзив программаларны оештыручы Гөлүсә Закирова сүзләренчә, бу бөтенләй яңа жанр.  
–    Бу концертны күзләре күрмәүчеләр өчен генә түгел, гомумән бөтен кешегә дә күрсәтәсе килү теләге бар иде. Шушы көннәрдә Казанда “Нәүрүз” фестивале уза. Якутиядәге коллегаларыбызның да килү форсатыннан файдаланып, тифлоконцертны үз тамашачыларыбызга да тәкъдим итәргә булдык, – дип сөйләде ул журналистларга.