Мал табиблары бәйрәм итте

Машина ачкычларын Татарстан Премьер-министры Алексей Песошин тапшырды.
– Сезгә бүген республика территориясендә ветеринария хезмәтендә иминлекне тәэмин итү бурычы йөкләнгән. Агросәнәгать комплексының үсеше, кошчылык һәм терлекчелек комплексларының, терлекчелек продукциясе җитештерүче фермерлык һәм шәхси ярдәмче хуҗалыкларның тотрыклы эше Дәүләт ветеринария хезмәтенең нәтиҗәле эшеннән тора, – дип белдерде Хөкүмәт рәисе.
Сүз уңаеннан, Татарстанда ветеринария хезмәтләренә ярдәм күрсәтү буенча программалар гамәлгә ашырыла. Бу – күчмә һәм стационар пунктлар белән тәэминат, кадрлар әзерләү. Президент программасы кысаларында, дәүләт ветеринария хезмәте ел саен яңартыла. Соңгы биш елда ветеринария белгечләренә 222 берәмлек махсус техника тапшырылган. Хөкүмәт ярдәме белән, ветеринария хезмәтендә эпизоотик отряд эшли. Аның эше өчен дезинфекция җайланмалары, җиһазлары, күчмә ветеринария пунктлары, җиңел һәм йөк машиналар, күчмә лаборатория белән тәэминат кайгыртыла.

Соңыннан мал табиблары, һөнәри бәйрәмнәрен билгеләп узар өчен, «Корстон» комплексында узган тантаналы чарага җыелды. Анда шушы тармактагы хезмәт алдынгыларына дәүләт бүләкләре тапшырылды.
Ветеринария хезмәткәрләрен һөнәри бәйрәмнәре белән Татарстан вице-премьеры – авыл хуҗалыгы һәм азык-төлек министры Марат Әхмәтов тәбрикләде.
– Бөек шагыйребез Габдулла Тукайның шигырендә «мин бераз чәчкән идем, урган идем» дигән сүзләр бар. Минем дә бер генә көн булса да сезнең халәттә булып караганым бар. Бу профессия кешеләренең никадәр фидакарь, хезмәтчән булуларына кыска гына вакыт эчендә дә инанган идем. Ветеринария хезмәте төшенчәсе дигәндә, минем күз алдыма Миннебай Гыйниятович килеп баса, – дип, Марат Әхмәтов республикада тармак белән 21 ел җитәкчелек иткән бу шәхес өчен аерым алкышлар сорады.

Министр ветеринария белгечләренең көн-төн эшләп, халык имин, сәламәт, тук булсын өчен тырышуларын билгеләп узды.
– Республика, бигрәк тә соңгы елларда, дәүләт ветеринария хезмәте статусына күбрәк игътибар юнәлтә. Дөрес, миңа фильмда ветеринария табибын песи, тычкан, көчек янында күрсәтүләре бераз аңлашылмый. Минем күзаллауда мал табибының роле, беренче чиратта, әлбәттә, эпизоотия иминлегендә. Медицина – кешене, ветеринария кешелекне дәвалый дип, юкка гына әйтмәгәннәр. Бу чыннан да шулай, – диде ул.

Фото: tatarstan.ru