Мэр 6 миллиард сумлык рәхмәт әйтте

- Татарстан Президенты Рөстәм Миңнехановка зур рәхмәт! Казан урамнары юлларын төзекләндерүгә быел безнең хыялларда гына булган 6,1 миллиард сум акча күчерелде, - диде башкала мэры Илсур Метшин.

Шәһәр Башкарма комитеты җитәкчесе урынбасары - тышкы төзекләндерү комитеты рәисе Игорь Куляжев чыгышында әйтелгәнчә, юлларны яңарту эшләре апрель аенда ук башланган. Северный, Борисоглебское, Тынычлык, Отары, Юдино, гомумән, 21 бистәдә әле дә юллар төзелеше бара. Царицынский бугор торак массивында һәм Әмәт бистәсенең Мичурин урамында юл төзү эшләре тәмамланган.

- Халыктан кергән күпсанлы үтенечләрне исәпкә алып, Салмачы бистәсендәге Кол Гали урамын киңәйтеп төзекләндерү эшләре дәвам итә. Юлның Габишев урамыннан Батыев урамына кадәрге өлеше - алты полоса, ә Батыев урамыннан Овражная урамына кадәрге өлеше дүрт полосалы итеп үзгәртелә, - диде Игорь Куляжев.

Кирпичников, 8 Март, Айдинов, Париж Коммунасы, Мөштәри, Тулпар урамнары юлларын төзекләндерә башлауга шулай ук казанлылардан кергән тәнкыйть хәбәрләре этәргеч биргән. Антирейтинг исемлегендә булган Зоя Космодемьянская, Дальняя, Качалов, Лебедев урамнары юллары, ниһаять, икенче сулыш алган. Шактый ватыла төшкән Баруди, Комаров, Кызыл Позиция урамнары юлларын төзекләндерү эшләре бара. Оренбург трактыннан М-14 микрорайонына илтә торган Бертуган Батталовлар урамы юлын, җәмәгать транспорты хәрәкәте җибәрү максатында, 8 метрга киңәйтү эшләренә киләсе елда керешеләчәк. Магистраль урамы юлын төзекләндерү дә киләсе ел планына кертелгән.

- Магистраль урамы юлын төзү буенча проект әзерләнә. Анда яңгыр сулары агу челтәрен дә яңартырга кирәк. Быел чокыр-чакырлар гына ямап торыла инде, - дип, докладчыга өстәп әйтте мэр Илсур Метшин.
«Имин һәм сыйфатлы юллар» федераль проекты кысаларында, Казанга 2 миллиард сум бирелгән. Аның 1,2 миллиарды - федераль, 800 миллион сумы республика бюджетыннан. Әлеге чыганакларга Әмирхан, Вишневский, Миль, Копылов урамнары, Ямашев проспекты юл өлешләре төзекләндерелгән. Тагын төрле урамнарга 12 светофор куелган, 4 километрдан артык озынлыкта рәшәткә ясалган, 530 юл билгесе урнаштырылган.
«Энергетик», «Строитель», «Залив», «Волга» бакчачылык ширкәтләренә инде яңа асфальт юлдан йөриләр.
- Казанда 3040 ишегалды бар, 2011 елдан башлап 1785 ишегалды яңартылды. Ишегалларын төзекләндергәндә, быел 6 мең машинага урын барлыкка китерелде, - диде Игорь Куляжев.