Онлайн остаханә: өйдә утырып остарабыз!

Бу хакта бүген журналистлар өчен оештырылган матбугат очрашуында фестивальнең координаторы Данил Данилов белдерде.

“20-22 ноябрь көннәрендә узачак фестивальдә 173 остаханә эшләячәк. Моннан тыш, республиканың мәктәп укучылары башкарган кул эшләнмәләре дә тәкъдим ителәчәк. Алар арасында җырчы робот, яктылык диодлы лампа һәм башка проектлар бар”, - ди ул.

Узган ел фестиваль Казан ярминкәсендә узган, анда 30лап эшләнмә тәкъдим ителгән. Аларның иң яхшыларын Мәскәүгә халыкара бәйгегә алып барганнар.

Быел исә фестиваль онлайн форматта узачак. Оештыручылар фикеренчә, онлайн чарага әзерләнү өчен күбрәк көч һәм вакыт сарыф ителгән. “Аның каравы, быел безгә һәркем кушыла алачак. Өйдә утырып остаханәләрдә катнашу, күңелгә ятышлы эшләнмә башкару мөмкинлеге булачак”, - ди оештыручылар. 

Трансляция КАИ бинасыннан алып барылыр дип көтелә. Аларны 4 меңләп кеше тамаша кылыр дип планлаштырыла.