Радиолар арасындагы волейбол уены 2022 елда кайда узачак?

Турнир кичә, 12 августта, Саба районында булды.

Ярышта «Тәртип» радиосы, «Болгар» радиосы, «Татар радиосы», «Күңел» (Чаллы), «Дулкын» (Саба), «Нократ дулкыннары» (Мамадыш), «Биектау FM», «Китап», «Татарстан» дәүләт радиосы — барлыгы 9 радио катнашты.

Беренче урынны «Биектау FM», икенчене — Сабаның «Дулкын» радиосы, өченчене — «Татарстан» радиосы яулады. Биектау командасы кубок иясе булды. Уен кагыйдәләре буенча, турнирда җиңгән команда ярышны киләсе елга оештыра. Шулай итеп 2022 елда татар телендәге радиостанцияләр арасындагы пляж волейболы буенча бәйге Биектау районында узачак.

Турнирда катнашучыларны Саба районы башлыгы Рәис Миңнеханов сәламләде. «Сездән башка берни эшләп булмый. Сез — мәгълүматны халыкка иң тиз җиткерүчеләр. Килүегез өчен зур рәхмәт. Ярыштан тыш, бер-берегез белән очрашу да — зур әйбер. Оештыручыларга бик зур рәхмәт!» — диде ул.

«Саба дулкыннары» телерадиокомпаниясе директоры Әлфия Мөбәрәкова дусларча матчның татар журналистлары арасындагы бердәмлекне ныгытуга юнәлдерелгәнен әйтте.

«2019 елда җиңеп, кубок алгач, шатлыгымнан: „Мин сезне Саба җиренә чакырам. Волейбол уйнар өчен яхшы урыныбыз бар“, — дип әйттем. Ярышларны бер ел буе көттем. Пандемия килеп чыкты шул. Аллаһка шөкер, быел җыелдык. Мин бу уеннарны оештырганда, татар радиолары арасындагы бердәмлекне, журналистларның бер-берсен шулкадәр хөрмәт итүен аңладым», — диде Әлфия Мөбәрәкова. 

Барлык катнашучыларга да истәлекле бүләкләр тапшырылды. Моннан тыш, ярышка килүчеләр Саба урман хуҗалыгы һәм дендрарийда экскурсиядә булды. 

Әлеге ярыш татар телендә сөйләүче радио хезмәткәрләренең очрашуын дустанә спорт бәйрәме дәрәҗәсенә җиткерү максатында оештырыла. Бу традициягә «Болгар» радиосының элеккеге директоры Илнур Фәйзрахманов нигез салган.

2019 елда уеннарны «Тәртип» радиосы оештырган иде. Ул вакытта сигез команда арасыннан беренчелекне Сабаның «Дулкын» радиосы яулады. Былтыр пандемия сәбәпле, волейбол турниры булмады.

Чыганак: "Татар-информ"