Ришат Төхвәтуллин: “Төрлене күргән бар, әмма мондый хәл беренче тапкыр...”

Җырчы Ришат Төхвәтуллин кызыклы да, кызганыч та хәлгә юлыккан. “Здравие Алтая” газетасы аның фотосурәтен реклама рәвешендә файдаланган. Фото янында мондый текст та бар: “Гомер буе тулы гәүдәле булдым, комплексларым бар иде. Спорт белән шөгыльләнә алмый идем, чөнки буыннарым авыртты. Яшь барган саен бу көчәйде генә. 1 тапкыр диетада утырдым, бераз ябыктым. Әмма соңрак авырлыгым тагын кайтты. Берсендә миңа газета килде һәм анда ябыгыр өчен кабул ителә торган  препарат турында язылган иде (препаратның исемен күрсәтмибез — ред.). Мин 21 килога ябыктым. Бу препаратны һәр кешегә дә тәкъдим итәм. Борис, Екатеринбург шәһәре”, - диелгән.

Ришат шул газетаны фотога төшереп куйган һәм: “Бу шарлатаннарга ышанмагыз. Мин беркайчан да таза булмадым һәм артык авырлыктан интекмәдем. Бигрәк тә препаратлар кабул итмәдем. Күп нәрсә күргән булды, әмма монысы беренче тапкыр”, - ди.

Язылучылары арасында бу хәлне кызык итеп кенә кабул итүчеләр бар. “Могҗизалы препараттан соң Борис Ришатка әйләнгән. “Хито-худин” эчкәннән соң гына җырлый да башлаган”, “”Эчем катты көлеп. Иртәгә Бориска концертка барабыз”, “Шулай итеп гомер буе алдадыңмы безне, Борис? Татарчаны озак өйрәндеңме?” дип язганнар алар Ришатка.

Җырчының фотосын рөхсәтсез файдаланган өчен судка бирергә киңәш итүчеләр дә бар.